वीरगंज | वीरगंज वारुणयन्त्रको फायरमैनसमेत रहेका वीरगंज–१६ नगवा निवासी बुनिलाल चौरसिया हत्याकाण्डमा प्रहरीले हत्याराको पहिचान गरेपनि समात्न भने सकेको छैन ।चौरसियाको कात्तिक ७ गते बेलुकी हत्या भएको थियो । उनको शव नगवास्थित पोखरीको डिलमा बोराभित्र राखेर प्mयाँकेको अवस्थामा घटनाको भोलिपल्ट कात्तिक ८ गते दिउँसो बरामद भएको थियोे ।
चौरसिया हत्याकाण्डको २५ दिन बितिसक्दा पनि पर्सा प्रहरीले हत्याको योजनाकारको रूपमा रहेका तीनजनालाई मात्र पक्राउ गर्न सकेको छ भने हत्यारा चारजनालाई समात्न सकेको छैन । प्रहरीले हत्याको योजनाकारको रूपमा वीरगंज–६ माईस्थान निवासी दीपककिशोर अग्रवाल, निजकी पत्नी निधि अग्रवाल र बारा इटियाही निवासी प्रेमचन्द्र साहलाई पक्राउ गरेको छ । उनीहरूमाथि सङ्गठित अपराध र कर्तव्य ज्यान मुद्दा लगाइएको छ । यो कसूरमा प्रहरीले अभियुक्तहरूलाई अदालतको आदेशमा ६० दिनसम्म हिरासतमा राखेर अनुसन्धान गर्न सक्छ ।
पर्सा प्रहरीको अनुसन्धानमा घटनाको दिन साँझ ५ बजेतिर बुनिलाल चौरसिया हेलमेट लगाएरै अग्रवालको घरमा प्रवेश गरेको सिसी क्यामरा फुटेजमा देखिएको छ । चौरसियासँग प्रेमचन्द्र साह पनि प्रवेश गरेको देखिएको छ । बुनिलालले सो दिन घरपरिवारमा अग्रवाल र साहसँग बक्यौता रकम लिन जान्छु भनेर तमसुक र चेकसहित हिंडेको परिवारका सदस्यले बताएका छन् । अग्रवालको घरमा जान भनेर हिंडेका चौरसिया घर फर्किएनन् । उनको शव भोलिपल्ट घरनजीकको नगवा पोखरीको डिलमा बोराले प्याक गरेको अवस्थामा स्थानीयले फेला पारेपछि प्रहरीलाई खबर गरेका थिए ।
प्रहरीले अग्रवाल दम्पतीलाई सोही साँझ पक्राउ गरेको थियो भने साहलाई अग्रवालको घरदेखि पूर्वतर्पm एकजना सोनारको पसलमा रहेको सिसी क्यामराको फुटेजपछि समातेको हो । हत्या भएको चौरसिया चढ्ने गरेको मोटरसाइकल घटनाको दुई दिनपछि अलखियामठदेखि कन्या मावि जाने बाटोको गल्लीमा फेला परेको थियो । चौरसियाको हत्या भएको र अग्रवाल दम्पती तथा साहको संलग्नता पुष्टि भएपनि अहिलेसम्म प्रहरीले हत्याराहरूलाई भने समाउन सकेको छैन । हत्यारा चारैजना भारत झारखण्ड निवासी भएको बुझिन आएको छ ।
निधि अग्रवालको माइत पनि झारखण्ड हो । उनले नै माइतबाट सुटर बोलाएर चौरसियाको हत्या गराएको प्रहरी अनुसन्धानबाट पुष्टि भएको छ । पर्साका प्रहरी उपरीक्षक सोभेन्द्र सिंह राठौरले हत्याका योजनाकारहरू पक्राउ परेको तर हत्यारा भने पक्राउ परिनसकेको बताए । उनले हत्यामा चारजनाको संलग्नता देखिएको र उनीहरूको खोजी कार्यमा प्रहरी लागेको बताए । पर्सा प्रहरीले बुनिलाल चौरसियाको हत्याको कारण पत्ता लगाउनेक्रममा परिवार र शङ्कास्पद २० जनाभन्दा बढीसँग बयान लिइसकेको छ । बयानको क्रममा धेरैले लेनदेनको कारण हत्या भएको कुरालाई अस्वीकार गरेको पाइएको छ । उनीहरूले आर्थिकभन्दा पनि अर्कै कारण हुन सक्ने आशङ्का व्यक्त गरेका छन् ।
पर्सा प्रहरीले अनुसन्धानको क्रममा भएको कारण घटनाको सबै कुरा सार्वजनिक गर्न नमिल्ने बताउँदै आएको छ । हत्या भएको हो र योजनाकार समातिएका छन् र हत्याराको खोजी कार्यमा प्रहरी लागेको छ भन्ने कुरालाई २५ दिनसम्म पर्सा प्रहरीले पत्रकारलाई दोह¥याउँदै आएको कुरा हो । हत्या भएको बुनिलाल चौरसिया वीरगंज वारुणयन्त्रमा फायरमैनमा जागीरे थिए । तर केही वर्षयता उनको जग्गाको कारोबारबाट व्यापक आर्थिक प्रगति भएको थियो । जग्गाको कारोबार र ढुकुटी खेलाउने कामबाट चौरसियाको आम्दानी बढेको बताइन्छ ।
उनले बजारमा ब्याजमा कारोबार गर्दै पनि आएका थिए । ठूलो परिमाणमा उनको लगानी छ भने थुप्रै मानिसलाई रकम दिनुपर्ने पनि छ । हत्यापछि प्रहरीले अनुसन्धानको क्रममा चौरसियाको बारेमा यी कुराहरूको पनि पत्ता लगाएको छ । एकजना प्रहरीले चौरसियाको आर्थिक कारोबार पछिल्लो समयमा निकै बढेको अनुसन्धानमा देखिएको बताएका छन् । पर्सा प्रहरीले हत्याकाण्डको गुत्थी हत्यारा पक्राउ परेकै दिन सार्वजनिक गर्ने बताएको छ ।
