काठमाडौं । गोयल कम्पनीमा कार्यरत एक कर्मचारीले अफिसको लागि उठाएको रकम १६ लाख रुपैयाँ आफ्नै कोठामा लुकाएर लुटिएको भन्दै उजुरी गरेपछि आफैं प्रहरीको फन्दामा परेका छन् । भारतको विहार घर भइ हाल काठमाडौंको डल्लु बस्ने २२ वर्षका मनोजकुमार शाहले आइतबार दिउँसो पाको न्युरोडमा मास्क लगाएका २ जनाले आफूले उठाएर ल्याएको रकम लुटेर भागेको भन्दै प्रहरीलाई खबर गरेका थिए ।

लगत्तै काठमाडौं प्रहरी परिसरबाट खटिएको टोलीले उनी लुटिएको भनिएको स्थानमा रहेका सीसीटीभी फुटेज हेर्दा त्यस्तो नदेखिएपछि पीडितमाथि नै आशंका गर्दै अनुसन्धान थालेको जनाएको छ । शाहले भनेअनुसारको कुनै पनि कुरा फुटेजमा नदेखिएपछि प्रहरीले उनीमाथि सोधपुछ गर्दा कोठामा रकम लुकाएको स्वीकार गरेका थिए ।

“बेइमानीपूर्वक ठगी खाने नियतले डल्लुस्थित कोठामा राखेको भन्ने बुझिन आएकोले निजको कोठामा गइ खोजतलास गर्दा उक्त रकम बैंकमा जम्मा नगरी आफ्नै दराजमा राखेको पाइयो,” परिसरका प्रवक्ता होविन्द्र बोगटीले जारी गरेको विज्ञप्तिमा उल्लेख छ ।