वीरगन्ज |वीरगन्जमा आयाेजित नेकोस कप राष्ट्रिय महिला टी–२० क्रिकेटको उपाधि कोशी प्रदेशले जितेको छ । वीरगन्जस्थित नारायणी क्रिकेट मैदानमा आइतबार भएको फाइनल खेलमा सशस्त्र प्रहरीको एपीएफ क्लबलाई ११ रनले पराजित गर्दै कोशीले उपाधि उचालेकाे हो ।
काेशीले दिएकाे ९९ रनकाे लक्ष्य पछ्याएको एपीएफले १९.५ ओभरमा अलआउट हुँदै ८७ रनमा समेटियो ।
उसका लागि कविता जोशीले सर्वाधिक १४ रन बनाइन् भने रेवती धामीले १२ र ममता चौधरीले ९ रन बनाइन्। बलिङतर्फ कोशीका रुबिना क्षेत्रीले ३ तथा, रिया शर्मा र निरु राजबन्शीले समान २/२ विकेट लिए ।
यसअघि टस जितेर पहिले ब्याटिङ गरेको कोशी प्रदेशले निर्धारित २० ओभरमा ४ विकेट गुमाएर ९८ रन बनाएको थियो । उसका लागि काजोल श्रेष्ठले सर्वाधिक ३८ रन बनाइन् भने प्रिन्सा रानाम मगरले १६ र रुबिना क्षेत्रीले १२ रन बनाइन् ।
बलिङतर्फ एपीएफका सबनम राई, सुमन बिष्ट र सीता राना मगरले समान एक–एक विकेट लिए।
कोशीको जितमा रुबिना चन्दले ४ ओभरमा १८ रन खर्चेर ३ विकेट लिँदै उत्कृष्ट बलिङ गरिन् । रिया शर्माले २ तथा निरु राजवंशीले २ विकेट लिएपछि एपीएफ लक्ष्यमा पुग्न असफल भयो ।
फाइनल खेलकाे ‘प्लेयर अफ द म्याच’ काेहीकी काजल श्रेष्ठ घोषित भइन् ।
उपाधि विजेता काेशीले ट्रफीसंगै नगद १ लाख रुपैयाँ पुरस्कार पनि पाएकाे छ।
प्रतियाेगिताकाे समान समाराेहमा मधेस प्रदेशका पूर्वमुख्यमन्त्री सरोज यादवले विजेता र उपविजेता खेलाडीलाई ट्रफी र मेडलवितरण गरे ।
