काठमाडौँ । फिफा विश्वकप २०२६ को समूह चरणका सबै खेल आइतबारदेखि सकिएको छ । जुन ११ देखि शुरु भएको विश्वकप प्रतियोगिता अमेरिका, मेक्सिको र क्यानडामा भइरहेको छ । त्यही फुटबल महाकुम्भको लाइभ हेर्ने नाममा सामाजिक सञ्जालबाट नेपाली नागरिकहरू ठगिएका छन् । एउटा गिरोहले फुटबलको नाममा ठगी धन्दा सञ्चालन गरेको भेटिएपछि प्रहरीको साइबर ब्यूरोले त्यसबारे अनुसन्धान गरिरहेको जनाएको छ ।
काठमाडौँमा बसेर रोजगारी गर्दै गरेका २५ वर्षीय एकजना युवक पोर्चुगल फुटबल टोलीको फ्यान थिए । लाइभ फुटबल हेर्ने प्लेटफर्म खोज्दा उनले सामाजिक सञ्जालमा एउटा विज्ञापन देखे । ‘नेपालको अल इन वान टिभी एप (जिजी टिभी)’ को विज्ञापन थियो त्यो । त्यसमा सबै च्यानल प्रत्यक्ष हेर्न सकिने, मोबाइल ट्याबलेट र एन्ड्रोइडमा पनि चल्ने उल्लेख थियो । फेसबुकमा देखिएको सो विज्ञापन उनले डाउनलोड गरे । डाउनलोड गर्दै जाँदा एप डेभलपरबाट यस्तो म्यासेज आयो, ‘तपाईको ग्लोबल स्मार्ट बैंक खाता सम्पत्ति शुद्धीकरणको इस्युमा लक भएको रहेछ, बैंकको पासवर्ड राखेर रिस्क हटाउनुहोस् ।
’
पीडितले पासवर्ड प्रविष्ट गरेको केही समयमा उनको खातामा भएको २३ हजार अपरिचित व्यक्तिको खातामा ट्रान्सफर भयो । भोटाहिटीस्थित प्रहरीको साइबर ब्युरोमा त्यस्तै खालका उजुरी आइरहेका छन् । जेठ महिनापछि अहिलेसम्म फुटबल हेर्ने नाममा ठगिएका १ सय १५ वटा उजुरी आएको ब्यूरोका एसपी दिलीप गिरीले रातोपाटीलाई बताए । उनले भने, ‘उजुरी दर्ता गरेर अनुसन्धान प्रक्रिया अघि बढाएका छौँ ।
’
विद्युतीय माध्यमबाट खाता ह्याक गरेर ठगीमा संलग्न गिरोहले फिफा विश्वकप निःशुल्क हेर्न पाइने विज्ञापन सामाजिक सञ्जाल फेसबुकमा राखेर ठगी धन्दा चलाएको प्रहरीको अनुसन्धान निष्कर्ष छ । पीडितहरूलाई फिसिङ गर्न उनीहरूले ‘एपिके फाइल’लाई माध्यम बनाउने गरेका छन् ।
