काठमाडौं । त्रिभुवन अन्तर्राष्ट्रिय विमानस्थलबाट अवैध रूपमा लुकाईछिपाई बाहिरी मुलुकतर्फ लैजान लागेको मुद्रासहित अमेरिकी नागरिकलाई पक्राउ गरिएको छ ।

पक्राउ पर्नेमा ७० वर्षीय डेभिड एलन हार्वुड रहेका छन् ।
उनको साथबाट ११५ अमेरीकी डलर, ४४ सिंगापुर डलर, २० हजार ९९० थाई भाट, २८ हजार १० भारतीय रूपैयाँ, ६ लाख ७ हजार ४९६ नेपाली रूपैयाँ र नेपाली लगायत विभिन्न भाषामा उल्लेखित रकम खुल्न नसकेका प्राचीन मुद्राहरू ६४ थान बरामद गरिएको छ ।

काठमाडौंबाट थाई उडान हुँदै बैंकक जान लागेका उनलाई विमानस्थलको अन्तर्राष्ट्रिय उडानतर्फको प्रस्थान होल्ड व्यागेज चेकिङ एरियामा जाँच तथा तलासी गर्ने क्रममा पक्राउ गरिएको हो ।

उनलाई आवश्यक कारबाही तथा अनुसन्धानको लागि भन्सार कार्यालयमा बुझाइने जनाइएको छ ।