वीरगंज | हिफर इन्टरनेशनल नेपाल र यसका कर्मचारीले प्रधानमन्त्री दैवी प्रकोप उद्धार कोषमा एक करोड रुपियाँ सहयोग गर्नुभएको छ । नेपाल तिब्बत सीमामा आएको भीषण बाढी–पहिरोबाट प्रभावित समुदायको राहत तथा पुनःस्थापनामा सहयोग गर्ने उद्देश्यसाथ संस्थाले उक्त रकम प्रदान गरेको हो ।

हिफर नेपालका अनुसार भदौं १० गते उच्च हिमाली क्षेत्रमा हिमपहिरो खस्दा नेपाल–तिब्बत सीमा क्षेत्र हुँदै विनाशकारी बाढी आएको थियो । बाढीका कारण रसुवा, नुवाकोट, धादिङलगायत जिल्लामा जनधन, घर, पूर्वाधार तथा जीविकोपार्जनमा ठुलो क्षति पुगेको छ ।

विपद्का कारण धेरै परिवार विस्थापित हुनुका साथै अत्यावश्यक सेवामा समेत असर परेको र प्रभावित क्षेत्रमा उद्धार तथा राहत कार्य चुनौतीपूर्ण बनेको संस्थाले जनाएको छ ।

हिफर नेपालको एक करोड रुपियाँको सहयोगमा संस्थाको आकस्मिक कोषबाट छुट्याइएको रकमसँगै कर्मचारीले आफ्नो तलबबाट गरेको स्वेच्छिक योगदानसमेत समावेश रहेको जनाइएको छ ।

हिफर इन्टरनेशनल नेपालका कन्ट्री डाइरेक्टर डा. तीर्थराज रेग्मीले विपद्को कठिन समयमा प्रभावित परिवार तथा समुदायसँग ऐक्यबद्धता जनाउँदै सरकारको राहत तथा पुनःस्थापना प्रयासमा सहयोग पुग्ने बताउनुभयो ।

“गहिरो क्षति र अनिश्चित्ताको समयमा आवश्यक परेका समुदायसँग एकताबद्ध भएर सहयोग गर्नु हाम्रो जिम्मेवारी हो । यो योगदान प्रभावित परिवार तथा समुदायप्रतिको ऐक्यबद्धताको अभिव्यक्ति हो” उहाँले भन्नुभयो ।

हिफर नेपालले प्रधानमन्त्री दैवी प्रकोप उद्धार कोषमा रकम सहयोग गर्नुका साथै प्रभावित समुदायका लागि तत्काल आवश्यक मानवीय सहायता उपलब्ध गराउने कार्यलाई समेत प्राथमिकता दिएको जनाएको छ । खाद्यान्न, स्वास्थ्य उपचारलगायत अत्यावश्यक सामग्री तथा सेवाका लागि संस्थाले सहयोग गर्ने जनाएको छ ।

प्रभावित परिवारको बदलिँदो आवश्यकताको मूल्याङ्कन गरी सम्बन्धित सरकारी निकाय, साझेदार संस्था तथा स्थानीय समुदायसँगको समन्वयमा सहयोगलाई प्रभावकारी बनाउने सो संस्थाले जनाएको छ ।

तत्कालीन राहत तथा उद्धारपछि पुनःस्थापनाको चरणमा प्रभावित परिवारको जीविकोपार्जन पुनःस्थापित गर्न तथा समुदायलाई आगामी विपद् सामना गर्न सक्नेगरी सक्षम र सबल बनाउन सहयोग गर्ने संस्थाले जनाएको छ । विपद्पछिको पुनःस्थापनाका लागि दीर्घकालीन सहयोग र सामूहिक प्रयास आवश्यक रहेको सो संस्थाको भनाइ छ ।