वीरगञ्ज । जनकपुर जयनगर रेलको ठक्करबाट लिक क्रस गरिरहेका एक जना मोटरसाइकल चालक घाइते भएका छन् । मोटरसाइकल किचिएर पूर्णरूपमा क्षतिग्रस्त भएको छ ।

मङ्गलवार साँझ साढे ७ बजेको करिबमा जयनगरबाट भंगहा तर्फ जाँदै गरेको रेलले जनकपुरको सीता चोक नजिक लिक क्रस गरिरहेको प्र–२–०२–००३ प ००९० नम्बरको मोटरसाइकललाई किचेको थियो ।

ठक्करबाट मोटरसाइकल चालक धनुषाको जनकपुरधाम उपमहानगरपालिका – १९ वेङगा पिपराडीका २६ वर्षीय राकेश कुमार यादव घाइते भएका छन् । स्थानीय प्रत्यक्षदर्शीका अनुसार झन्डैले मोटरसाइकल चालकको ज्यान जोगिएको थियो । मोटरसाइकलमा ठक्कर लागेपछि यादव लिक बाहिर लडेका थिए ।

यादवको दायाँ खुट्टा र छातीको भित्री भागमा चोट लागेको प्रहरीले जनाएको छ । उनको उपचार हाल प्रादेशिक अस्पताल जनकपुरमा भइरहेको छ ।