वीरगंज । वीरगञ्जबाट देशका विभिन्न गन्तव्यका लागि छुटेको मालवाहक ट्रकहरूलाई अवैध सामग्रीसहित बारा प्रहरीले नियन्त्रणमा लिएको छ । बिलबिजक भन्दा बढी तथा राजश्व छलीका सामग्री बोकेर वीरगञ्जबाट काठमाडौँ र रुपन्देहीको तर्फ हिँडेको चार वटा मालवाहक ट्रकलाई बारा प्रहरीले नियन्त्रणमा लिएको हो । जिल्ला प्रहरी कार्यालय बाराका अनुसार नियन्त्रणमा लिइएका ट्रकहरूमा बिलबिजक भन्दा बढी अथवा राजश्व छलीका अर्थात् स्रोत खुल्न नसकेको सामग्री भेटिएको छ । बिहीबार एउटा सूचना जारी गर्दै बारा प्रहरीले नियन्त्रणमा लिइएको ट्रकहरूबाट बरामद सामग्रीको मूल्य झन्डै एक करोड ३१ लाख ९५ हजार २५ रुपैयाँ रहेको जनाएको छ ।

प्रहरीले आज बिहान जितपुरसिमरा उपमहानगरपालिकाको अमलेखगञ्ज र जितपुरमा वीरगञ्जबाट काठमाडौँ तर्फ हिँडेको ना. ६ ख ७१ नम्बरको मालवाहक ट्रकबाट ३५ लाख २७ हजार ४७४ रुपैयाँ, बा. ४ ख ११२५ नम्बरको मालवाहक ट्रकबाट ३६ लाख ६२ हजार ९७२ रुपैयाँको सामग्री बरामद गरिएको जनाएको छ । त्यस्तै वीरगञ्जबाट रुपन्देही तर्फ हिँडेको ना. ४ ख ११२५ नम्बरको मालवाहक ट्रकबाट २४ लाख ९९ हजार ५७९ रुपैयाँ र ना. ६ ख ३०२४ नम्बरको डिब्बा ट्रकबाट ३४ लाख ९५ हजार रुपैयाँ गरी कूल एक करोड ३१ लाख ९५ हजार २५ रुपैयाँ बराबरको सामग्री नियन्त्रणमा लिएको बारा प्रहरीका प्रवक्ता एवम् प्रहरी नायव उपरीक्षक (डिएसपी) दधिराम न्यौपानेले जानकारी दिए ।

ट्रकहरूलाई नियन्त्रणमा लिएर आवश्यक कानुनी कारबाही अगाडि बढाइएको डिएसपी न्यौपानेले बताए । नेपालीहरूको ठूला चाडपर्व दसैँ, तिहार छठ नजिकिँदै बेला देशको मुख्य व्यापारिक सहर वीरगञ्जको बाटो हुँदै करोडौँ बराबरको अवैध सामाग्री बरामद गर्नु बारा प्रहरीको लागि ठूलो उपलब्धि हो । यद्यपि पर्सा प्रहरीले जिल्लामा शान्ति सुरक्षा र तस्करी नियन्त्रण चुस्त दुरुस्त रहेको दाबी गरिरहँदा उनीहरूको नाकको तलबाट करोडौँ मूल्यको सामग्रीसहित चार वटा ट्रक बारा पुग्नले विभिन्न प्रश्नहरू उत्पन्न गरेको छ । यसअघि पनि वीरगञ्जबाट देशका विभिन्न ठाउँका लागि हिँडेका मालवाहक ट्रकहरूलाई बारा र मकवानपुर प्रहरीले नियन्त्रणमा लिएको थियो ।

पर्सामा नेपाल प्रहरी, सशस्त्र प्रहरी, भन्सार र राजश्व अनुसन्धान गर्ने निकायहरू हुँदाहुँदै बिलबिजक भन्दा बढी सामग्री भएको ट्रक बारा र मकवानपुर जिल्लाबाट नियन्त्रणमा आउनुले यहाँको प्रहरी र प्रशासनको काममाथि नै शङ्का उत्पन्न गरेको छ । के नेपाल प्रहरी, सशस्त्र प्रहरी र अन्य निकायहरू आफ्नो काममा चुकिरहेका छन् की आफ्नै संरक्षणमा तस्करी गराइरहेका छन् ? आम पर्सेली जनताले प्रहरीसँग यो प्रश्न सोध्ने बेला आएको छ ।