वीरगंज । जनता समाजवादी पार्टी नेपालका सांसद प्रदीप यादवले वीरगन्ज स्थित नारायणी अस्पतालमा जनशक्ति थप गर्न सरकारसँग माग गरेका छन् । बुधबार प्रतिनिधिसभा बैठकमा बोल्दै पर्सा क्षेत्र नम्बर १ का सांसद यादवले नारायणी अस्पतालका लागि आवश्यक उपकरणको व्यवस्था गर्न पनि सरकारको ध्यानाकर्षण गराएका हुन् । उनले भने,’म सभामुख महोदयमार्फत् नेपाल सरकारको ध्यानाकर्षण गराउन चाहन्छु-नारायणी अस्पतालमा दरबन्दीको व्यवस्था होस् ।

उपकरणको व्यवस्था होस् ।’नारायणी अस्पतालमा विरामीको चाप बढेकाले चिकित्सकसहितको थप जनशक्तिको पनि सरकारले तत्काल व्यवस्था गर्नुपर्ने उनको भनाइ थियो । उनले भने, ‘नारायणी अस्पतालमा विरामीहरुको संख्या बढी छ । बारा, पर्सा, रौतहट, सर्लाही र भारतका समेत नागरिकहरु सेवा लिन नारायणी अस्पताल आउँछन । तर, जनशक्ति त्यहाँ अत्यन्तै कम छ । समग्रमा कुरा गर्ने हो भने त्यहाँ १५० जना चिकित्सकहरुसहितको जनशक्ति छ त्यहाँ। तर, राज्यको त्यहाँ ध्यान पुगेको छैन ।’

‘नारायणी अस्पताल अहिले जीर्ण भईसकेको छ । त्यहाँको स्थानीयको श्रमदानको बनेको अस्पताल हो । त्यसमा नेपाल सरकारको लगानी छैन।’ उनले भने । उनले वीरगन्ज स्थित नारायणी रंगशालाको जिर्णोदारको लागि बजेटको तत्काल व्यवस्था गर्न पनि सरकारलाई सचेत गराए ।