काठमाडौं । सरकारका प्रवक्ता सञ्चार तथा सूचना प्रविधिमन्त्री गोकुल बास्कोटाले कोरोना भाइरसबाट त्रस्त नहुने आग्रह गरेका छन् ।

नेपालमा हालसम्म कोरोना संक्रमित नभएको दाबी गरिरहँदा प्रवक्ता बास्कोटाले पनि नडराउन आग्रह गरेका हुन् ।बिहीबार मन्त्रालयमा मन्त्रिपरिषद्को निर्णय सार्वजनिक गर्न आयोजित पत्रकार सम्मेदलनमा मन्त्री बास्कोटाले चीनमा रहेका विद्यार्थी–नागरिक उद्धार गर्न सरकार प्रतिबद्ध रहेको र तयारी गरिरहेको बताएका छन् ।तर बिहीबार नै नेपाली विद्यार्थीका अभिभावक स्वास्थ्य मन्त्रालय पुगेर आफूहरुका छोराछोरी छिटो नेपाल ल्याइदिन आग्रह गरेका छन् ।चीनमा रहेका विद्यार्थीहरुले पनि भिडियो सन्देश जारी गर्दै आफूहरुले राम्रोसँग खाना पनि नपाएको गुनासो गर्दै छिटो फिर्ता गर्न आग्रह गरेका छन् ।

तर सञ्चारमन्त्री बास्कोटाले चिनियाँ राजदूतावासले पनि नेपालीलाई आफ्नो नागरिक सरह सुरक्षित राख्ने आवश्यक सेवा–सुविधान उपलब्ध गराउने बताएकाले नआत्तिन अभिभावकहरूलाई आग्रह पनि गरेका हुन् ।“कोरोनासँग चीन जुधिरहेको छ । विश्व सतर्क छ । विश्व स्वास्थ्य संगठनले संकट्काल घोषणा गरेको छ । हामी पनि अत्यन्त संवेदनशील छौं । चीनलेजस्तो एक सातामै एक हजार शय्याको अस्पताल बनाउन त सक्दैनौं । पुँजीको अभाव नभए पनि प्रविधि र जनशक्ति हामीसँग छैन । हामीले पनि तीन सय शय्याको अस्पताल बनाउने निर्णय गरिसकेका छौं,” उनले भने ।

उनले सरकारले चारपटक बैठक बसेर चीनबाट उद्धार गरेर ल्याउने विद्यार्थी राख्ने ठाउँको व्यवस्थापन भइरहेको उनको भनाइ थियो । प्रधानमन्त्री केपी शर्मा ओलीले सबै व्यवस्थापनका लागि स्पष्ट निर्देशन दिएको उनको भनाइ थियो । प्रधानमन्त्रीले आजैमात्र तालुकदार मन्त्रालयहरूलाई बोलाएर इचङ्गुनारायण, खरिपाटी, शिवपुरी, सूर्यबिनायक लगायतका ठाउँमा राख्न र आइसोलेसनका लागि आवश्यक पर्ने सबै चिजको बन्दोबस्त मिलाउन निर्देशन दिएका थिए ।

बास्कोटाले पनि चीनमा रहेका नेपाली नागरिक समस्यामा नपरेको, तीन छाक खाना खुवाएर राखेको बताउँदै नेपालमा पनि आइसोलेसनमा राख्नुपर्ने र त्यसका लागि तयारी गर्नुपर्ने भएकाले उद्धार गर्न विलम्ब भएको बताए ।“चीनसँग सम्पर्कमा छौं । चिनियाँ अधिकारीले समन्वय गरिरहेका छन् । सबै नेपाली सुरक्षित छन् । हाम्रो दूतावासले पनि समन्वय गरिरहेको छ,” उनले भने ।