पर्सा । प्रादेशिक अस्पताल पोखरियामा आवश्यक स्वास्थ्य सेवा प्रभावकारी रूपमा सञ्चालन हुन नसक्दा बिरामी तथा सेवाग्राही समस्यामा परेको गुनासो बढ्दै गएको छ। अस्पतालमा एक्सरे सेवा नियमित नहुनु तथा ल्याब परीक्षणका लागि आवश्यक सामग्रीको अभाव हुँदा बिरामीहरू महँगो शुल्क तिरेर निजी अस्पताल तथा क्लिनिकमा जान बाध्य भएको स्रोतले जनाएको छ।
अस्पतालमा रहेको एक्सरे मेसिन पटक–पटक बिग्रिने गरेको र लामो समयसम्म मर्मत नहुँदा सेवाग्राहीले सास्ती खेप्दै आएका छन्। त्यस्तै, ल्याब परीक्षणका लागि आवश्यक केमिकल तथा अन्य सामग्रीको अभावका कारण कतिपय परीक्षण प्रभावित हुने गरेको बताइएको छ।
अस्पतालमा एक्सरे सेवा सञ्चालनका लागि आवश्यक प्राविधिक जनशक्ति तथा रेडियोलोजिस्टको व्यवस्थापन प्रभावकारी हुन नसकेको गुनासो छ। तर, अन्य क्षेत्रमा भने कर्मचारीको संख्या बढ्दै गएको भन्दै अस्पतालको जनशक्ति व्यवस्थापनमाथि प्रश्न उठ्न थालेको छ।
स्थानीय तथा स्रोतका अनुसार अस्पतालमा बिरामीका लागि अत्यावश्यक सेवा सञ्चालन गर्न आवश्यक कर्मचारीको अभाव देखिए पनि अन्य प्रकृतिका कर्मचारी थपिँदै गएको अवस्था देखिएको छ।
स्रोतका अनुसार पोखरिया अस्पतालमा स्वीकृत सरकारी दरबन्दी सीमित रहे पनि मधेश प्रदेश सरकार तथा सम्बन्धित मन्त्रालयबाट दैनिक ज्यालादारी र करार सेवामा थप कर्मचारी पठाउने क्रम बढेको छ।
स्वीकृत दरबन्दीअनुसार आवश्यक जनशक्ति व्यवस्थापन गर्नुभन्दा विभिन्न माध्यमबाट कर्मचारी थपिँदा अस्पतालमाथि अनावश्यक आर्थिक भार बढेको स्रोतको दाबी छ।
तर, अस्पतालमा कर्मचारी थपिँदै गए पनि बिरामीका लागि आवश्यक एक्सरे तथा ल्याब परीक्षणजस्ता आधारभूत सेवा नियमित सञ्चालन हुन नसकेको भन्दै स्थानीयले सम्बन्धित निकायसँग जवाफ मागेका छन्।
स्रोतले स्वास्थ्य मन्त्रालय तथा मातहतका निकायमा दैनिक ज्यालादारी र करार सेवामा कर्मचारी नियुक्त गर्दा आर्थिक चलखेल हुने गरेको आरोपसमेत लगाएको छ। स्रोतका अनुसार केही नियुक्तिमा एक लाखदेखि दुई लाख रुपैयाँसम्म रकम लिने गरिएको दाबी गरिएको छ।
यस्तै, अस्पताल प्रशासनसँगको मिलेमतोमा केही कर्मचारीलाई हाजिर गराई अन्यत्र कामकाजमा खटाउने गरिएको दाबीसमेत स्रोतले गरेको छ।
यस्ता आरोप गम्भीर भएकाले सम्बन्धित निकायबाट निष्पक्ष छानबिन गरी सत्यतथ्य सार्वजनिक गर्नुपर्ने स्थानीयको माग छ।
सरकारी अस्पतालमा सर्वसाधारणले सस्तो, सहज र गुणस्तरीय स्वास्थ्य सेवा पाउने अपेक्षा गर्छन्। तर, अस्पतालमै आवश्यक एक्सरे तथा ल्याब परीक्षण सेवा सहज रूपमा उपलब्ध नहुँदा बिरामीहरू निजी अस्पताल तथा क्लिनिकमा जानुपर्ने बाध्यतामा छन्।
निजी संस्थामा परीक्षण गराउँदा सरकारी अस्पतालको तुलनामा बढी शुल्क तिर्नुपर्ने अवस्था रहेको सेवाग्राहीको गुनासो छ।
स्थानीयको प्रश्न छ—“अस्पतालमा कर्मचारी थपिँदै जाने, तर बिरामीका लागि आवश्यक एक्सरे र ल्याब परीक्षणजस्ता आधारभूत सेवा नियमित रूपमा उपलब्ध नहुने अवस्था किन?”
अस्पतालमा देखिएको सेवा अभावको वास्तविक कारण सार्वजनिक गर्दै एक्सरे मेसिनको नियमित मर्मत, आवश्यक प्राविधिक जनशक्तिको व्यवस्थापन तथा ल्याबका लागि आवश्यक केमिकल र सामग्री तत्काल उपलब्ध गराउनुपर्ने माग उठेको छ।
त्यस्तै, दरबन्दीभन्दा बढी कर्मचारी राखिएको भनिएको विषय, करार तथा दैनिक ज्यालादारीमा भएका नियुक्ति र कर्मचारीको कार्यविवरणबारे समेत सम्बन्धित निकायले छानबिन गरी पारदर्शिता कायम गर्नुपर्ने स्थानीयको माग छ।
अस्पतालमा जनशक्ति तथा बजेट बढ्दै जाने तर बिरामीले आधारभूत स्वास्थ्य सेवा नपाउने अवस्था अन्त्य गर्न मधेश प्रदेश सरकार, स्वास्थ्य मन्त्रालय तथा अस्पताल प्रशासनले तत्काल ठोस कदम चाल्नुपर्ने देखिन्छ।
