वीरगञ्ज ।लालबाबु सिंह । देशकै अग्रणी औषधि उत्पादक कम्पनी क्वेष्ट फार्मास्युटिकल्स प्रा. लि. ले आफ्नो २५औँ स्थापना दिवस तथा विश्वकर्मा पूजाको अवसरमा आयोजना गरेको बृहत् रक्तदान कार्यक्रममा ५ महिलासहित १०७ जना रक्तवीरले रक्तदान गरेका छन्।

कम्पनीको छातापिपरास्थित कारखाना परिसरमा आयोजित रक्तदान कार्यक्रममा कम्पनीका कारखाना तथा वीरगञ्ज कार्यालयमा कार्यरत कर्मचारीहरूको उत्साहजनक सहभागिता रहेको थियो।

रक्तदान गर्नेहरूमा अन्जुम आरा, सुमित्रा चौधरी, सन्तो कुमारी थपलिया, रामबिनेश चौरसिया, गोविन्दप्रसाद अधिकारी, मेराजुदिन अन्सारी, राजु त्रिपाठी, प्रदीप कुमार ठाकुर, दिनेश महतो, उमेश कुमार कडेल, अजय पटेल लगायत रहेका छन्।

क्वेष्ट फार्मास्युटिकल्सका उमेश श्रेष्ठले “रक्तदान नै जीवनदान हो” भन्ने मूल भावनालाई आत्मसात गर्दै सामाजिक उत्तरदायित्वअन्तर्गत रक्तदान कार्यक्रम आयोजना गरिएको बताए।

उनले भोटेकोशी बाढीबाट देशका विभिन्न क्षेत्रमा प्रभावित तथा घाइतेहरूको उपचारमा सहयोग पुग्नुका साथै स्थानीय क्षेत्रमा हुन सक्ने रगतको अभाव न्यूनीकरण गर्न कार्यक्रम आयोजना गरिएको जानकारी दिए।

श्रेष्ठले रक्तदान कार्यक्रममा सहभागी सबै रक्तवीरप्रति आभार व्यक्त गर्दै कम्पनीको २५औँ स्थापना दिवसको शुभकामना समेत व्यक्त गरे।

रक्तदान कार्यक्रममा रक्तसञ्चार केन्द्र वीरगञ्जका प्रमुख सौरभ पाण्डेको नेतृत्वमा प्राविधिक टोलीले सहयोग गरेको थियो। केन्द्रले रक्तदान कार्यक्रम आयोजना गरी सामाजिक उत्तरदायित्व निर्वाह गरेकोमा क्वेष्ट फार्मास्युटिकल्स परिवारप्रति आभार व्यक्त गरेको छ।

कम्पनीले स्थापना दिवसको अवसरमा रक्तदानजस्ता सामाजिक तथा मानवीय कार्यलाई निरन्तरता दिँदै समुदायप्रतिको आफ्नो जिम्मेवारीलाई थप मजबुत बनाउने जनाएको छ।