प्रसौनी | बारा प्रसौनी गाउँपालिका वडा नं. १ स्थित मुख्य बजार क्षेत्रमा नवनिर्मित अत्याधुनिक बहुउद्देश्यीय भवनको धार्मिक तथा विधिवत पूजा अनुष्ठान भव्यताका साथ सम्पन्न भएको छ। भदौ १० गते आयोजित उक्त विशेष धार्मिक पूजा कार्यक्रममा गाउँपालिकाका अध्यक्ष एवं मुख्य कर्ता श्री विनोद प्रसाद जैसवालले पूजा सञ्चालन गर्नुभएको थियो।
स्थानीय पूर्वाधारको सुदृढीकरण तथा समुदायलाई सहज सेवा-सुविधा उपलब्ध गराउने उद्देश्यले कुल ३ करोड ४३ लाख रुपैयाँको लागतमा यो भवन निर्माण सम्पन्न गरिएको हो। वैदिक मन्त्रोच्चारणका साथ विधिपूर्वक पूजापाठ सम्पन्न भएपछि उपस्थित सम्पूर्ण सहभागीहरूलाई प्रसाद वितरण गरिएको थियो।
कार्यक्रमका मुख्य कर्ता जैसवालले गाउँपालिकाको समग्र विकास र स्थानीय समुदायको साझा हितका लागि यस्तो आधुनिक पूर्वाधार तयार हुनु अत्यन्तै गौरवको विषय भएको बताउनुभयो। बजार क्षेत्रको केन्द्रमा निर्माण भएको यस भवनले आगामी दिनमा गाउँपालिकाका विभिन्न सामाजिक, सांस्कृतिक, सार्वजनिक तथा प्रशासनिक गतिविधिहरू व्यवस्थित रूपमा सञ्चालन गर्न महत्त्वपूर्ण टेवा पुर्याउने विश्वास व्यक्त गरिएको छ।
यसअघि व्यवस्थित भवन तथा सभा हलको अभावका कारण ठूला सार्वजनिक भेला, तालिम, गोष्ठी तथा सामाजिक उत्सवहरू आयोजना गर्न स्थानीयले भोग्दै आएको समस्यालाई यस नयाँ संरचनाले समाधान गर्ने अपेक्षा गरिएको छ। बजारको मुख्य क्षेत्रमा अवस्थित यो भवनले नागरिकहरूलाई सामूहिक कार्य, सामाजिक जमघट र सेवा प्रवाहमा ठूलो सहजता ल्याउनेछ।
