वीरगंज | कम्पनी मर्क र मोडेर्नाले विकास गरेको नयाँ क्यान्सर खोपले ऐतिहासिक नतिजा दिएको दाबी गरिएको छ। कम्पनीका अनुसार एउटा औषधिसँगको संयुक्त प्रयोगले परीक्षणका क्रममा छालाको क्यान्सर पुनः फर्किनबाट रोक्न सफल भएको छ। यसलाई क्यान्सर उपचारको क्षेत्रमा कोसेढुङ्गा मानिएको छ।

यो खोप उच्च जोखिमयुक्त मेलानोमा अर्थात् छालाको क्यान्सर भएका बिरामीहरूलाई शल्यक्रियापछि दिइएको थियो। प्रारम्भिक नतिजाअनुसार यसले बिरामीहरू क्यान्सरमुक्त रहने अवधि बढाएको देखिएको छ। तर यो प्रभाव कति लामो समयसम्म रहन्छ भन्ने अझै स्पष्ट नभएको कम्पनीले बताएका छन्।

क्यान्सर विशेषज्ञहरूले यसलाई महत्वपूर्ण सफलता भनेका छन्, तर पूर्ण नतिजा सार्वजनिक तथा स्वतन्त्र विशेषज्ञबाट समीक्षा हुन बाँकी रहेकाले सावधानी अपनाउनुपर्ने बताएका छन्। परीक्षण प्रक्रिया पूरा भएपछि पनि यो उपचारले नियामक निकायबाट स्वीकृति पाउनुपर्नेछ। त्यसपछि मात्रै यसलाई सर्वसाधारण बिरामीका लागि उपलब्ध गराउने प्रक्रिया अघि बढ्नेछ।

इन्टिस्मेरान नाम दिइएको यो खोपलाई क्यान्सर उपचारमा पहिलेदेखि प्रयोग हुँदै आएको किट्रुडा नामक इम्युनोथेरापी औषधिसँग मिलाएर प्रयोग गरिएको थियो। कम्पनीहरूका अनुसार केवल किट्रुडा प्रयोग गर्नुको तुलनामा खोप र औषधिको संयुक्त प्रयोगले बिरामीहरू क्यान्सरमुक्त रहने अवधि उल्लेखनीय रूपमा बढाएको छ। साथै, क्यान्सर शरीरका अन्य अंगमा फैलिने जोखिम पनि घटेको बताइएको छ।

तेस्रो चरणको परीक्षणमा उच्च जोखिमयुक्त दोस्रो, तेस्रो र चौथो चरणका मेलानोमा भएका एक हजारभन्दा बढी बिरामी सहभागी थिए। उनीहरूमा क्यान्सरको अवस्था एउटै स्थानमा ठूलो ट्युमर भएकोदेखि शरीरका अन्य भागमा फैलिसकेको अवस्थासम्म थियो।