वीरगंज |  राष्ट्रिय स्वतन्त्र पार्टीका सभापति रवि लामिछानेले प्रधानमन्त्री बालेन्द्र शाह कवि तथा कलाकार भएकाले उनले बोलेका शब्दको सोझो अर्थमात्र लगाउन नमिल्ने बताएका छन्।

प्रधानमन्त्री शाहले केही दिनअगाडि लेखेको स्टाटसमा आफू एक्लो रहेको गुनासो गरेका थिए।

सोही गुनासोमाथि सिंहदरबारमा बुधबार आफ्ना दलका मन्त्री तथा सांसदहरूसँग भेटेपछि बाहिर निस्कने क्रममा सञ्चारकर्मीहरूसँग लामिछानेले भने- ‘उहाँ त एउटा कवि पनि हो, कलाकार पनि हो नि अहिले यहाँ यत्रो भीडमा पनि मैले एक्लो फिल गर्न सक्दिनँ र? त्यसैले हामीले खोजे जस्तो हरेक शब्दको अर्थ खोज्न गयो भने त्यसको राजनीतिक अर्थ भन्ने नै हुँदैन। यत्रो सिंगो पार्टी सँगै उभिएको छ कहाँ उहाँ एक्लो हुनु?’

संसदीय दलको बैठकमा संसदीय दलका नेता तथा प्रधानमन्त्री शाह आफैँ भने उपस्थित थिएनन्।

यसबारे उनले सञ्चारकर्मीहरूसँग भने- ‘आजको बैठक भने सांसदहरू र सभापति बीचको छलफल हो। दलको बैठकमा दलका नेता आइहाल्नुहुन्छ त्यसमा दुविधा छैन।’

प्रधानमन्त्री शाह र सभापति लामिछानेबीचको तुसबारे सार्वजनिक भइरहेका बेला लामिछानेले प्रधानमन्त्री शाहको बचाउ गरेका हुन्।

त्यस्तै, सभापति लामिछानेले मन्त्री फेरिन लागेको विषयमा सत्यता नरहेको पनि बताएका थिए।

बैठकमा लामिछानेले मन्त्री तथा सांसदहरूसँग बोलीमा संयमित रहन आग्रह गरेका थिए। बाहिर निस्केर भने उनले आफ्ना मन्त्री तथा सांसदहरूको बचाउ गर्दै भने- ‘धेरै सांसद भएको राजनीतिक दलभित्र कहिले कसको, कहिले कसको बोली चिप्लिन सक्छ। कहिलेकाहीँ काम गर्दागर्दै यताउता हुन सक्ने पनि होला। जसरी यति धेरै पत्रकार साथीहरू हुनुहुन्छ सबैको समाचार सही नहुन पनि सक्छ। कहिले हेडलाइन बिग्रिन्छ, कहिले के। त्यस्तै हामी पनि धेरै छौँ। धेरैमध्ये एक दुई जनाले बोलेको विवादमा पनि पर्छ तर त्यसलाई हामीले सम्हालिहाल्छौँ।’