वीरगंज| वर्षौंदेखि बन्द रहेको वीरगञ्ज चिनी कारखाना पुनः सञ्चालनमा ल्याउने प्रक्रिया अघि बढाउन सरकारले सम्भाव्यता अध्ययन गर्ने भएको छ। उद्योग, वाणिज्य तथा आपूर्तिमन्त्री गौरीकुमारी यादवको पहलमा कारखानाको वर्तमान अवस्था अध्ययन गरी पुनः सञ्चालनको सम्भाव्यता र आवश्यक कार्ययोजना तयार गर्न कार्यदल गठन गरिएको हो।
मन्त्रिपरिषद्को निर्णयबाट खारेजीमा परेको कारखानाको वर्तमान अवस्था, विगतमा भएका निर्णय तथा यसअघि तयार भएका अध्ययन र प्रतिवेदनको समीक्षा गरी अब चाल्नुपर्ने कदम पहिचान गर्न कार्यदल गठन गरिएको मन्त्रालयले जनाएको छ।
उद्योग, वाणिज्य तथा आपूर्ति मन्त्रालयका सि.डि.ई. श्रीकान्त यादवको संयोजकत्वमा गठित कार्यदलमा मन्त्रालयका शाखा अधिकृत तथा उद्योग विभागका अधिकृत प्रतिनिधि सदस्य छन्। कार्यदललाई १५ दिनभित्र अध्ययन प्रतिवेदन पेश गर्न समयसीमा तोकिएको छ।
कार्यदलले कारखाना पुनः सञ्चालन गर्न आवश्यक वित्तीय, आर्थिक, प्राविधिक तथा कानुनी आधारको समेत मूल्यांकन गर्नेछ। यसअघि कारखानाका विषयमा गठन भएका विभिन्न कार्यदलले दिएका सुझाव र सिफारिसको समीक्षा गर्दै विगतका निर्णय कार्यान्वयन हुन नसक्नुका कारणसमेत पहिचान गरिने मन्त्रालयले जनाएको छ।
कारखाना परिसरमा रहेका भवन, उत्पादन संरचना, मेसिनरी तथा पार्टपुर्जाको अवस्थाबारे अध्ययन गरी पुरानै संरचना र उपकरणबाट सञ्चालन गर्न सकिने वा नयाँ प्रविधि तथा संरचनामा लगानी गर्नुपर्ने विषयमा पनि कार्यदलले निष्कर्ष दिनेछ। साथै, पुनः सञ्चालनका लागि आवश्यक सम्भावित लगानी र प्राविधिक पुनर्संरचनाको आधारसमेत तयार गरिनेछ।
त्यसैगरी, कारखानाको स्वामित्वमा रहेको जग्गा तथा अन्य सम्पत्तिको अवस्था, सम्पत्तिसँग जोडिएका कानुनी तथा व्यवस्थापकीय समस्या र तिनका समाधानका विकल्पसमेत अध्ययन गरिनेछ।
वीरगञ्ज चिनी कारखाना लामो समयदेखि बन्द रहे पनि पटक–पटक पुनः सञ्चालनको चर्चा हुँदै आएको थियो। तर, सम्पत्ति, पुराना मेसिनरी, कानुनी विवाद तथा आवश्यक लगानीबारे ठोस निष्कर्ष नआउँदा प्रक्रिया अघि बढ्न सकेको थिएन।
यसपटकको अध्ययनले कारखाना पुरानै संरचनाबाट सञ्चालन गर्ने, पुनर्संरचना गरी नयाँ लगानी गर्ने वा अन्य व्यावसायिक विकल्प अपनाउने भन्ने विषयमा आधार तयार गर्ने अपेक्षा गरिएको छ।
कारखाना पुनः सञ्चालनमा आएमा लामो समयदेखि उपयोगविहीन रहेको सार्वजनिक सम्पत्तिको उपयोगसँगै चिनी उत्पादन, रोजगारी सिर्जना र स्थानीय आर्थिक गतिविधिमा समेत सकारात्मक प्रभाव पर्ने अपेक्षा गरिएको छ।