वीरगंज  | पुराना म्याद गुज्रेका असुरक्षित सिलिन्डर र कम तौलका ग्यास बिक्री गर्नर् ेगरेको पाइएपछि जिल्ला प्रशासन मोरङले रिजालको भान्सा ग्यास उद्योगलाई दुई लाख ९५ हजार जरिवाना गरेको छ ।

जिल्ला प्रशासन मोरङको नेतृत्वमा गएको अनुगमन टोलीले २७ साउनमा मोरङको बुढीगंगा गाउँपालिका– ५ मा रहेको रिजालको भान्सा ग्यास उद्योगमा ग्यास भरेर सिलबन्दी गरिएका सिलिन्डरमा कम तौल र म्याद गुज्रेका पुराना सिलिन्डरमा पनि ग्यास भरिएको फेला पारेको थियो ।

जिल्ला प्रशासन मोरङका अनुसार उद्योगपरिसरमा रहेका १९ वटा भरिएका सिलिन्डर तौलजाँच गर्दा एउटा सिलिन्डरमा दुई सय ४० ग्राम कम ग्यास पाइएको थियो । यसैगरी, केही पुराना म्याद गुज्रिएर असुरक्षित बनेका सिलिन्डरमा पनि ग्यास भरेर बजारमा पठाउन ठिक्क पारिएको थियो । त्यसैले म्याद गुज्रिएका सिलिन्डर ग्यास खाली गर्न लगाएर नष्ट गराइएको थियो ।

यसैगरी, अनुगमनमा सहयोग नगर्ने विराटनगर महानगरपालिका– ३ स्थित कञ्चनेश्वर ग्यास पसललाई पनि प्रशासनले १५ हजार रुपैयाँ जरिवाना गरेको छ । मोरङ प्रशासनले २५ साउनमा बुढीगंगा गाउँपालिका– ४, निमुवामा रहेको कोशी ग्यास उद्योगले सिलिन्डरमा कम तौल राखेको फेला परेपछि दुई लाख ९० हजार रुपैयाँ जरिवाना गरेको थियो । साथै, अनुगमनका क्रममा असहयोग गर्ने विराटनगर महानगरपालिका– ७ स्थित श्रीकृष्ण ट्रेडर्सलाई ११ हजार रुपैयाँ जरिवाना गरेको थियो ।