वीरगंज | भारी वर्षा र चट्याङको सम्भावनालाई मध्यनजर गर्दै जिल्ला प्रशासन कार्यालय मनाङले चामे-बेंसीशहर सडकखण्डमा रात्रिकालीन सवारी आवागमनमा रोक लगाएको छ।
प्रशासनले असार १६ र १७ गतेका लागि यस सडकखण्डमा चल्ने सार्वजनिक, निजी तथा सरकारी सबै प्रकारका सवारी साधनको सञ्चालन समय निर्धारण गर्दै रात्रिकालीन यात्रामा प्रतिबन्ध लगाएको हो।
जल तथा मौसम विज्ञान विभागले ती दुई दिन मनसुन गतिविधि बढ्न गई मेघगर्जनसहित मध्यमदेखि भारी वर्षा हुने पूर्वानुमान गरेको छ। सम्भावित विपद्बाट यात्रु र सवारी साधनलाई सुरक्षित राख्न जिल्ला सुरक्षा समितिको निर्णयअनुसार यस्तो व्यवस्था गरिएको हो।
प्रमुख जिल्ला अधिकारी नवराज पौड्यालले जारी गरेको सूचनामा यात्रु तथा सवारी साधनमा क्षति हुन नदिन सुरक्षा सतर्कता अपनाउनका लागि सवारी आवागमनको समय निर्धारण गरिएको उल्लेख छ।
प्रशासनले तोकेको नयाँ समयतालिका अनुसार चामे-३, कोतोदेखि लमजुङको बेंसीशहरसम्म जाने सवारी साधन छुट्ने अन्तिम समय बेलुका ४ बजेलाई तोकिएको छ।
यसैगरी, नासों-१, तालडाँडा चौकीदेखि बेंसीशहरसम्म जाने सवारी साधन छुट्ने अन्तिम समय बेलुका ५:३० बजेलाई निर्धारण गरिएको छ।
तोकिएको अन्तिम समयपछि गाडी चलाउन पाइने छैन। प्रशासनका अनुसार बेलुका रोकिएका सवारी साधनहरू भोलिपल्ट बिहान ५ बजेपछि मात्र गन्तव्यतर्फ प्रस्थान गर्न पाउनेछन्।
