वीरगंज । सिमरा,पथलैया–वीरगन्ज व्यापारिक मार्ग र फुटपाथ अतिक्रमण गरी विस्तार गरिएको बजार र अव्यवस्थित पार्किङ हटाइने भएको छ । बारा र पर्साका सरोकारवाला निकायबीच मंगलबार भएको बैठकले ६ लेनको उक्त मार्ग खाली राख्ने निर्णय गरेको हो । व्यापारिक मार्ग विस्तारित योजनाको कार्यालयमा भएको बैठकले ६ बुँदे निर्णय गर्दै पथलैयादेखि गण्डकसम्मको सडक क्षेत्रमा निर्माण भएका पूर्वाधार, बजारीकरण गर्न राखिएका सामाग्री र अव्यवस्थित पार्किङ हटाउने निर्णय गरेको हो ।

उक्त कार्यको नेतृत्व व्यापारिक मार्ग आयोजनाको कार्यालयले गर्ने र सो कार्यमा जीतपुरसिमरा उपमहानगरपालिका, जिल्ला प्रशासन कार्यालय, जिल्ला प्रहरी कार्यालय, तराई यातायात व्यवसायी संघ र उद्योग वाणिज्य संघले सहयोग गर्ने भएको छ ।यसैगरी बैठकले उद्योग कलकारखानाबाट निस्कने फोहोरजन्य पदार्थ, पानीलाई नालामा मिसाउने कार्य भईरहेको हुँदा सो कार्य रोक्ने, कोइला डिपोबाट निस्कने पदार्थ सडकमा छोड्ने र नालामा मिसाउने गरेको हुँदा त्यस्ता गतिविधिलाई समेत नियन्त्रण गर्ने निर्णय गरेको छ । पथलैया–वीरगन्ज व्यापारिक मार्गलाई सफा र प्रदुषणमुक्त बनाउन विभिन्न निर्णय गरेको बैठकले ओभरब्रिज निर्माणका लागि सिफारिस गर्ने समेत निर्णय गरेको छ ।

व्यापारिक मार्ग योजना प्रमुख दिपेन्द्र पाण्डेयको अध्यक्षतामा सम्पन्न छलफलमा जीतपुरसिमरा उपमहानगरपालिकाका नगर प्रमुख राजन पौडेल, उप्रमुख भोलाप्रसाद अधिकारी, बाराका प्रमुख जिल्ला अधिकारी नवराज सापकोटा, परवानीपुर गाउँपालिका अध्यक्ष राम क्षेत्री कुर्मी, प्रहरी उपरीक्षक होबिन्द्र बोगटी, सशस्त्र प्रहरी उपरीक्षक टोपबहादुर डाँगी, राष्ट्रिय अनुसन्धान कार्यालयका उपअनुसन्धान निर्देशक अभिनयकुमार सिंह, ईलाका प्रहरी कार्यालय सिमराका प्रहरी नायब उपरीक्षक प्रदीपबहादुर क्षेत्री, ट्राफिक प्रहरी निरीक्षक सुशिल आचार्य, जीतपुरसिमरा उपमहानगरपालिका वडा नम्बर २ का वडाध्यक्ष धनबहादुर श्रेष्ठ, वडा नम्बर ७ का वडाध्यक्ष सुनिल गुप्ता, जीतपुरसिमरा नगर उद्योग वाणिज्य संघका अध्यक्ष मोहन शर्मा लामिछाने, महासचिव प्रकाश गिरीलगायत सहभागी थिए ।