वीरगंज | मुग्लिन–पोखरा सडक खण्डमा तीव्र गति, चालकको थकान र वर्षाका कारण सडक चिप्लो हुँदा सवारी दुर्घटना बढ्न थालेपछि जिल्ला प्रहरी कार्यालय तनहुँ र ट्राफिक प्रहरीले सडकमा निगरानी बढाएका छन् ।

निर्माणाधीन सडकमा विशेष गरी बिहानपख चालक निदाउने र तीव्र गतिमा सवारी चलाउँदा दुर्घटनाको जोखिम बढ्ने भएकाले प्रहरी टोली बिहान ४ बजेदेखि नै सडकमा खटिन थालेको छ ।

जिल्ला प्रहरी कार्यालय तनहुँका प्रमुख प्रहरी उपरीक्षक टेकबहादुर कार्कीका अनुसार दुर्घटनाका मुख्य कारण पहिचान गरी त्यसलाई न्यूनीकरण गर्न प्रहरी स्वयं सडकमा खटिएर निगरानी सुरु गरिएको हो ।

“लामो दूरीका चालक थकानका कारण झुक्ने, वर्षाका कारण सडक चिप्लो हुने र त्यसमा पनि तीव्र गतिमा सवारी चलाउँदा दुर्घटना बढेको पाइयो,” उहाँले भन्नुभयो, “त्यसैले बिहानैदेखि सडकमा चालकलाई रोकेर मौसम, सडकको अवस्था र लेन अनुशासनबारे प्रत्यक्ष जानकारी गराउने काम भइरहेको छ ।”

अभियानअन्तर्गत प्रहरीले शुक्रबार बिहान ४ बजेदेखि ७ बजेसम्म ११७ वटा सवारीसाधनका चालकलाई सडकमा रोकेर सचेतना तथा परामर्श दिएको छ । तीमध्ये ६३ वटा ठुला सवारी, ३६ वटा साना चारपाङ्ग्रे र १८ वटा दुईपाङ्ग्रे सवारीसाधन रहेका छन् ।

जिल्ला प्रहरी कार्यालय तनहुँका सूचना अधिकारी प्रहरी नायब उपरीक्षक द्वारिकाप्रसाद घिमिरेले निर्माणाधीन सडक खण्डमा चालकको सामान्य असावधानीले ठुलो क्षति हुने भएकाले प्रहरी सक्रियता बढाइएको बताउनुभयो ।

“मुग्लिन–पोखरा सडक खण्डमा विस्तारको काम भइरहेकाले धेरै ठाउँमा डाइभर्सन र चिप्लो सडक छ । यस्तो अवस्थामा तीव्र गति नियन्त्रण गर्न र चालकको थकान कम गर्न प्रहरीले सडकमा पुगेर परामर्श दिइरहेको छ,” उहाँले भन्नुभयो ।

प्रहरीले सडकको अवस्था हेरेर मात्र गति निर्धारण गर्न तथा वर्षात्को समयमा विशेष सतर्कता अपनाएर सवारी चलाउन सबै चालकलाई आग्रह गरेको छ ।यसअघि शुक्रबार दिउँसो व्यास नगरपालिका–१२ छिर्कनेमा माइक्रोबस दुर्घटना हुँदा आठ जना घाइते भएका थिए ।