वीरगंज | पाँचथरको याङवाराक गाउँपालिका–२ मा अवस्थित केन्जो बगैँचा यतिखेर सेताम्मेभएको छ । विगत वर्षभन्दा एक साताअगावै फुल्न थालेको केन्जो वयस्क देखिन थालेपछि यो क्षेत्र मनमोहक भएको हो । यस क्षेत्रमा रहेका सयौँ बिघा चौरमा कहीँ केन्जो फुलिसकेको छ त कहीँ फक्रन थालेको छ ।
केन्जो चार हजार मिटरभन्दा उच्च भूभागमा पर्ने हिमालका घाँसे मैदान र चट्टानी भूभागमा फव्रिmने दुर्लभ वनस्पति हो । यो फुल्न थालेसँगै हेर्न र तस्बिर खिच्न आन्तरिक पर्यटकको आवागमन बढ्न थालेको स्थानीय अमिर राईले जानकारी दिनुभयो ।
तिम्बुङ पोखरीनजिकै रहेको पाँचथरको याङवाराक गाउँपालिका–२ मा केन्जोको प्राकृतिक बगैँचामा धेरै केन्जो फुल्ने भएकाले स्थानीयले यो क्षेत्रलाई ‘केन्जो गार्डेन’ नामकरण गरिदिएका छन् । फेदमा हरिया पात र माथिल्लो भागमा सेता पत्र तह तहमा टुप्पोसम्म फैलिने भएकाले टाढाबाट हेर्दा टावर जस्तै देखिने भएकाले पछिल्लो समय यसलाई ‘हिमाली टावर’ पनि भन्न थालिएको छ ।
समुद्री सतहबाट करिब चार हजार तीन सय मिटरभन्दा माथिको घाँसे मैदान र चट्टानी क्षेत्रमा पाइने केन्जो पूर्वी नेपालको सीमित हिमाली भूभागमा मात्र फैलिएको अध्ययनले देखाएको छ । तिम्बुङ पोखरीआसपास यसको पर्याप्त प्राकृतिक फैलावट रहेको स्थानीय बताउँछन् । टाढाबाट हेर्दा हिउँको थुप्रो जस्तै देखिने भएकाले यो वनस्पतिले हिमाली भूदृश्यलाई थप आकर्षक बनाउँछ ।
केन्जो फुल्न थालेसँगै तिम्बुङ पोखरी जाने पदमार्गमा चहलपहलसमेत बढेको छ । पर्यटक केन्जोको बगैँचामा पुगेर तस्बिर तथा भिडियो बनाउने, प्राकृतिक दृश्यावलोकन गर्ने र हिमाली वातावरणको आनन्द लिन थालेका छन् ।
फिदिम–४ का वासु घिमिरे केन्जोकै आकर्षणले बर्सेनि तिम्बुङ पुग्ने गरेको बताउनुहुन्छ । उहाँले हालसम्म छ पटक तिम्बुङ पोखरी क्षेत्रको भ्रमण गरिसक्नुभएको छ । झापा दमकका धनपति घिमिरेले तस्बिरमा देखिएको केन्जो फुलेका सिजनमा यहाँ आइपुग्दा अद्भुत अनुभूति भएको बताउनुहुन्छ ।
तिम्बुङ पोखरी क्षेत्रमा पर्यटन व्यवसाय सञ्चालन गर्दै आउनुभएका अमिर राईका अनुसार केन्जो नै यस क्षेत्रको मुख्य आकर्षण हो । उहाँका अनुसार गत वर्ष ताप्लेजुङतर्फको पदमार्ग हुँदै करिब दुई हजार आन्तरिक तथा केही भारतीय पर्यटक यो क्षेत्र आइपुगेका थिए । जहाँ पाँचथर र सिक्किमतर्फबाट आउने पर्यटकको भने अभिलेख समावेश छैन ।
केन्जो दुर्लभ र औषधीय गुण भएको वनस्पति हो तर भ्रमणमा आएका केही व्यक्तिले फव्रिmएका बोट भाँच्ने र उखेल्ने गरेकाले त्यस्तो प्रवृत्ति रोक्नुपर्ने स्थानीयको भनाइ छ । स्थानीय गणेश राई भन्नुहुन्छ, “केन्जोको जगेर्ना गर्नु भ्रमणमा आउनेको पनि दायित्व हुन्छ । त्यसका लागि पर्यटकलाई सचते गराउनु जरुरी छ ।” तिम्बुङ क्षेत्रसँगै भारतको सिक्किमस्थित विष्णु पोखरीआसपास पनि यतिबेला केन्जो फुलेको देख्न सकिन्छ । हिमाली भूभागको आकर्षणका रूपमा परिचित केन्जोले तिम्बुङ पोखरी क्षेत्रको पर्यटन प्रवर्धनमा महŒवपूर्ण योगदान पु¥याउँदै आएको स्थानीयको विश्वास छ ।
