वीरगंज । रामनिवास कुमार पटेल । नेपाली कांग्रेसका संस्थापक नेता स्वर्गीय विश्वेसर प्रसाद कोइरालाको ४१ औं स्मृति दिवसको अवसरमा शनिबार कांग्रेस पर्साले जिल्लाभरमा वृक्षारोपण कार्यक्रम गरेको छ । गत असार ११ गते बसेको कांग्रेस पर्साको जिल्ला कार्य समितिको बैठकको निर्णय अनुसार विपी स्मृति दिवसको अवसरमा शनिबार जिल्लाका सबै ११२ वडामा कांग्रेसले वृक्षारोपण गरेको कांग्रेसका जिल्ला उपसभापति रामनारायण कुर्मीले बताए । उनका अनुसार शनिबार जिल्लाका सबै १४ वटा पालिकाका ११२ वटै वडामा वृक्षारोपण गरिएको हो । हरेक वडामा कम्तिमा १ सय भन्दा बढी विरुवा रोप्ने कार्यक्रम अन्तर्गत शनिबार ११२ वटै वडामा कांग्रेस नेता कार्यकर्ताहरुले विभिन्न प्रजातिको विरुवा रोपेको कुर्मीले जानकारी दिए ।


यसैक्रममा पर्सागढी नगरपालिका वडा नम्बर ७ मा पनि कांग्रेसको वडा कार्र्यसमितिको आयोजनामा वृक्षारोपण गरिएको छ । वडा नम्बर ७ मा पर्ने टिकुलिया टोलस्थित ने रा प्रबि स्कुलको परिसरमा विभिन्न प्रजातिका विरुवाहरु रोपिएको कांग्रेस बुथ सभापति शम्भु राउत कुर्मीले बताए। कुर्मीकै अध्यक्षतामा भएको वृक्षारोपण कार्यक्रमा पर्सागढी नगरपालिका वडा नम्बर ७ का वडा अध्यक्ष शंकर राय भर ,कांग्रेस नेताहरु बीरबहादुर यादव , रामजोध्या यादव ,अर्जुन गिरि लगायतको सहभागीता थियो ।

कांग्रेस पर्साले ४१ औं विपी स्मृति दिवस सप्ताह व्यापी रुपमा मनाउने निर्णय गरे अनुसार शनिबार पहिलोदिन वृक्षारोपण गरिएको कांग्रेस पर्साका उपसभापति कुर्मीले जानकारी दिए । दोश्रो दिन साउन ७ गतेदेखि हरेक वडामा संगठन सुदृढिकरण अभियान सञ्चालन गरिने पनि कुर्मीले जानकारी गराए । संगठन सुदृढिकरण अभियान साउन महिनाभरि चल्ने भन्दै कुर्मीले जसअन्तर्गत हरेक वडामा अगुवा कार्यकर्ता भेला गर्ने , वडा कार्य समितिको कार्यालय स्थापना गर्ने , वडा कार्यसमितिको नियमित बैठक गर्ने जस्ता कार्यक्रमहरु रहेको कुर्मीले बताए ।