काठमाडौं । जेन जि पर्साका संयोजक बिशेष साहले विज्ञान, प्रविधि तथा नवप्रवर्तन मन्त्री माननीय महावीर पुनज्यूसँग भेटघाट गर्दै सरकारी विद्यालय तथा कलेजहरूमा प्रयोगात्मक शिक्षालाई प्रभावकारी बनाउन आधुनिक Practical Lab तथा Research Centre स्थापना र सञ्चालन गर्नुपर्ने विषयमा महत्वपूर्ण प्रस्ताव तथा पहल गरेका छन्।
भेटका क्रममा साहले सरकारी विद्यालय तथा कलेजहरूमा प्रयोगात्मक ज्ञानको अवस्था कमजोर रहेको उल्लेख गर्दै विद्यार्थीलाई किताबको सैद्धान्तिक ज्ञानमा मात्र सीमित नराखी प्रयोग गरेर सिक्ने वातावरण निर्माण गर्नुपर्ने धारणा राखे।
आफूले Master’s of Science in Analytical Chemistry अध्ययन गरेको अनुभवसमेत उल्लेख गर्दै साहले Practical Knowledge प्रत्येक विद्यार्थीका लागि अत्यावश्यक मात्र नभई उनीहरूको अधिकारको विषयसमेत भएको बताए। उनले देशका विभिन्न स्थानमा आधुनिक प्रयोगशाला, Research Centre तथा नयाँ अनुसन्धानका संरचना स्थापना गर्नुपर्ने प्रस्ताव मन्त्री पुनसमक्ष राखे।
साहको प्रस्तावप्रति मन्त्री पुनले सकारात्मक समर्थन जनाउँदै स्थानीय सरकारले Lab निर्माण तथा सञ्चालनका लागि रुचि देखाएर आवश्यक बजेट छुट्याए संघीय सरकारले समेत आवश्यक सहयोग र बजेट उपलब्ध गराउने प्रतिबद्धता व्यक्त गरेको साहले बताए।
त्यसैगरी, आगामी दिनमा विभिन्न स्थानमा नयाँ Research Lab तथा अनुसन्धान केन्द्र स्थापना र विस्तारका लागि आवश्यक बजेट व्यवस्थापनतर्फ पहल गर्ने विश्वाससमेत मन्त्री पुनले दिलाएका छन्।
जेन जि पर्साका संयोजक बिशेष साहले आफ्नो पर्सा जिल्ला तथा स्थानीय तहमा Practical Lab निर्माण र सञ्चालनका लागि स्थानीय सरकारसँग सहकार्य, समन्वय तथा आवश्यक पहल गर्ने प्रतिबद्धता व्यक्त गरेका छन्।
भेटका क्रममा आगामी दिनमा विज्ञान, प्रविधि, अनुसन्धान तथा नवप्रवर्तनको क्षेत्रमा मिलेर काम गर्ने विषयमा समेत छलफल भएको थियो।
साहले विद्यार्थीलाई केवल किताबी ज्ञानमा सीमित नराखी “किताबसँगै प्रयोगशाला, प्रयोगसँगै अनुसन्धान” को वातावरण निर्माण गर्नुपर्नेमा जोड दिएका छन्।
