वीरगञ्ज । जितपुरसिमरा उपमहानगरपालिकाले नगरस्तरको अस्पताल सञ्चालनको लागि जनशक्ति छनौट गरेको छ । जितपुर सिमरामा डाक्टर र बिशेषज्ञ चिकित्सक सहितको सेवा नभएपछि उपमहानगरपालिकाले आफ्नै खर्चमा अस्पताल सञ्चालनको तयारी गरेको हो ।औद्योगिक करिडोर र जनघनत्व बढी भएको क्षेत्र भएपनि जितपुर सिमरामा डाक्टर सहितको स्वास्थ्य सेवा नभएपछि उपमहानगरपालिकाले जनअपेक्षा अनुसार अस्पताल सञ्चालन गर्न लागेको मेयर राजन पौडेलले बताए । उनले यस क्षेत्रका जनता सामान्य स्वास्थ्य उपचारको लागि वीरगञ्ज र हेटौडा जानुपर्ने अवस्था अन्त्य गर्न उपमहानगरपालिकाको पहलमा अस्पताल शुरु गर्न लागिएको जानकारी दिए ।प्राथमिक स्वास्थ्य केन्द्र सिमरामा उपलब्ध रहेका कोठाहरुबाटै केही दिन भित्रै नगर अस्पताल सञ्चालनका लागि अब तयारी भइरहेको प्रमुख पौडेलले बताए । अस्पतालको भवन निर्माणको काम सम्पन्न नभए सम्म स्वास्थ्य केन्द्रको भवनबाट सेव सञ्चालन गरिने मेयर पौडेलको भनाई छ ।

यस क्षेत्रमा अस्पताल नहुदा नागरिकले आधारभुत स्वास्थ्य सुबिधा सम्म पाउन बञ्चित हुने देखिएकोले नगर अस्पताल सञ्चालनका लागि आफुहरुको ध्यान केन्द्रित भएको उनले बताए ।जितपुरसिमरा उपमहानगरपालिकाले अस्पताल सञ्चालन गर्न माघ १ गतेदेखिनै तलब खुवाउने गरी तीन मेडिकल अधिकृत, तीन स्टाप नर्स , एक फार्मेसी सहायक नियुक्त गरेको छ । संघीय सरकारको डाक्टरको दरबन्दी भएपनि पटक पटक माग गर्दा समेत सिमरा प्राथमिक स्वास्थ्य केन्द्रमा बिगत लामो समयदेखि डाक्टर बिहिन हुदै आएको छ ।जनताको प्रत्यक्ष सरोकार जोडिएको स्वास्थ्य, कृषी र पशु सेवालाई सुदृढ गर्दै नागरिकमा सेवा प्रवाह बढाउने सोचका साथ तीनै क्षेत्रमा छनौट भएका प्राविधिक कर्मचारीलाई बुधवार नियुक्ति पत्र दिइएको उपमहानगरपालिकाले जनाएको छ ।

उपमहानगरपालिकाको कार्यालयमा नगर प्रमुख राजन पौडेल र प्रमुख प्रशासकीय अधिकृत चेतनाथ खरेल, सुचना अधिकारी रामेश्वर बन्जारा, वडा नं १ का वडाअध्यक्ष हिरा बहादुर गुरुङ लगायतको उपस्थितीमा एक समारोहका बिच छनौट भएकाहरुलाई बधाई सहित नियुक्ती पत्र प्रदान गरिएको थियो ।कार्यक्रममा नव नियुक्त मेडिकल अधिकृतहरु प्रशान्त बर्णवाल, प्रतिक कुमार र सुजल अधिकारी, फार्मेसी सहायक अशोक कुमार साह , स्टाफ नर्सहरु सविना रेग्मी, तरानुम नेसा र राधिका सुब्बा, कृषी अधिकृत अनिस प्याकुरेल र पशु चिकित्सक सुवाश झाले नियुक्ती पत्र बुझदै नगरको निर्देशन बमोजिम आफनो जिम्मेबारीमा कमी हुन नदिने प्रतिबद्धता जनाएका थिए ।