काठमाडौं । नेपाली क्रिकेट टोलीका पूर्व कप्तान विनोद दासले पारस खड्का नेपाली क्रिकेट इतिहासकै सफल कप्तान भएको बताएका छन् । उनले पारस जस्तै कप्तानीको भूमिकामा नयाँ खेलाडी आउन अझै धेरै समय लाग्ने बताए ।खड्काले राजीनामा दिएपछि प्रतिक्रिया दिँदै दासले भने, “पारसले राजीनामा दिने समय भएको छैन ।

मैले क्रिकेट समर्थकको हिसाबले भन्ने हो भने पारसले नेपाली क्रिकेटमा अझै दुई वर्ष जति कप्तानीमा रहँदा राम्रो हुने थियो । अहिले नेपाली क्रिकेटको अवस्था हेर्ने हो भने नयाँ खेलाडी र पूरै टिमलाई अगाडि लैजाने कप्तानको रुपमा पारसलाई लिन सकिन्छ ।”दासले थपे, “कप्तानीको र नेतृत्वकर्ताको हिसाबले हेर्दा नेपाली क्रिकेटले पारसलाई जति लामो समय कसैलाई जिम्मेवारी दिएको छैन ।

व्यक्तिगत रुपमा भन्नुपर्दा पारस नेपाली क्रिकेट इतिहासकै सफल कप्तान हुन् । हालसम्म नेपाली क्रिकेटले जो जति कप्तानको रुपमा पायो, त्यसमा उनको महत्वपूर्ण भूमिका छ ।”साथै उनले नेपाली क्रिकेटले पाएको हरेक सफलतामा पारसको ठूलो हात रहेको र पारसले एउटा कप्तानमात्र नभई खेलाडीको रुपमा पनि महत्वपूर्ण भूमिका खेलेको बताए ।