काठमाडौं | एमडी/एमएस, एमबिबिएस र सम्पूर्ण चिकित्सा शिक्षा विज्ञानको योग्यताक्रम विपरित भर्ना प्रक्रियाविरुद्ध चिकित्सकहरुले मंगलबार पनि शान्तिपूर्ण प्रदर्शन गरेका छन्। मंगलबार माइतीघर मण्डलामा भेला भएर चिकित्सकहरुले चिकित्सा शिक्षा आयोगले गरेको सर्वोच्च अदालतको आदेश अवज्ञा र एमडी/एमएस, एमबिबिएस र सम्पूर्ण चिकित्सा शिक्षा विज्ञानको योग्यताक्रम विपरित भर्ना प्रक्रियाविरुद्ध शान्तिपूर्ण प्रदर्शन गरेका हुन्। उनीहरुले आज २२ औं दिनसम्म पनि सरकार र सम्बन्धित निकायहरुले आफ्ना मागहरु पूरा नगरेको भन्दै विरोध प्रदर्शन गरेका हुन्। विरोध प्रदर्शनका क्रममा सञ्चारकर्मीहरुसँग डा. छवि पन्थीले एमडी/एमएसको प्रवेश परीक्षाको नतिजामा वैज्ञानिक व्यवस्थापन हुन नसकेको बताए। उनले योग्यताक्रम मिचेर भर्ना प्रक्रिया अघि बढाएकाले आफूहरु आन्दोलनमा उत्रिनुपरेको बताए।
उनले आयोगमा नेतृत्व गरेका पदाधिकारीहरु कानूनी राजभन्दा माथि हो ? भन्दै प्रश्न गरे। उनले भने, ‘गत पुस महिनाको २ गते चिकित्सा शिक्षा आयोगले एमडी/एमएसको प्रवेश परीक्षा लिएको थियो। यसको सन्दर्भमा करिब एक हप्तामा नतिजा निकाल्यो, त्यसको वैज्ञानिक व्यवस्थापन गर्ने बेलामा त्रुटीपूर्ण तरिकाले व्यवस्थापन गरेको छ। योग्यताक्रम मिचेर भर्ना प्रक्रिया अघि बढाएकाले हामीले अदालतमा मुद्दा हालेका छौँ। चिकित्सा शिक्षा आयोग र आयोगको नेतृत्व गरिरहेका पदाधिकारीहरुले सम्मानित सर्वोच्च अदालतले गरेको फैसला अनुरुप योग्यताक्रम नमिचिने गरी आएको जुन आदेश थियो, त्यसको विरुद्धमा उहाँहरु गएको कारणले हामीले अवहेलनाको मुद्दा दर्ता गरेका छौँ। आयोगमा नेतृत्व गरेका पदाधिकारीहरु कानूनी राजभन्दा माथि ध्रुवे हात्ती, उन्मत्त हात्ती बनाएर बसेका छन्, उनीहरुले विद्यार्थीहरुको मर्का बुझेका छैनन्।’
प्रदर्शनकारी चन्दनकुमार गोइतले र्यांकअनुसार विद्यार्थीहरुले भर्ना पाउनुपर्ने माग गरे। उनले विद्यार्थीहरुमाथि चिकित्सा शिक्षा आयोगले बारम्बार आक्रमण गरिरहेको आरोप लगाए। उनले भने, ‘हामी दुई महिनादेखि आन्दोलनरत छौँ। हाम्रो माग योग्यताक्रम मिचिनु नहुने हो। र्यांकअनुसार विद्यार्थीहरुले भर्ना पाउनुपर्छ, अहिले गोलाप्रथा जस्तो भयो। विद्यार्थीहरुमाथि आयोगले बारम्बार आक्रमण गरिरहेको छ।’ आन्दोलनरत चिकित्सक रविना श्रेष्ठले परीक्षा दिएको ५ महिनासम्म पनि प्रक्रियाअनुसार काम हुन नसकेको बताइन्। उनले प्रक्रियाअनुसार पढ्न मन रहे पनि नपाएको गुनासो गरिन्। उनले राष्ट्रिय आविष्कार केन्द्रका संस्थापक महावीर पुनका माग २ दिनमै सम्बोधन भए पनि विद्यार्थीहरुका माग सम्बोधन गर्न कुनै निकाय नआएको आरोप लगाइन्।
उनले भनिन्, ‘हामीले परीक्षा दिएको ५ महिना भयो, हामीलाई प्रक्रियाअनुसार पढ्न मन छ, महावीर पुनको माग २ दिनमा पूरा भयो तर हाम्रो माग कसैले सुनेन। चिकित्सा शिक्षा आयोगले हाम्रो केस लम्ब्याउँदै गरेको छ।’ उनीहरुले ‘विद्यार्थीको भविष्यसँग खेल्न पाइँदैन’, ‘मेरा साना दुःखले आर्ज्या र्यांक होइन’, ‘सबै प्रमाण छन् खिचेको, योग्यताक्रम मिचेको’, ‘योग्यताक्रम लागू गर्’, ‘देशको स्वास्थ्य नबिगारी देउ’, ‘चोक चोकमा स्वर छ, चिकित्सा शिक्षा आयोगमा चोर छ’, ‘न्याय माग्न कुन गोरखा जानु ? न्यायपालिकाभन्दा ठूलो कार्यपालिका कसरी भयो ?’, ‘नखाउँ भने वर्षभरको शिकार, खाउँ भने छुट्ने भयो अधिकार’ लगायतका प्लेकार्ड बोकी विरोध प्रदर्शन गरेका थिए।
