वीरगंज | उनी बडीबिल्डर होइनन्, जसलाई ‘धर्मश्री’ पदक जित्नुछ । उनी बैंसालु ठिटो पनि होइनन्, जसलाई सिक्स प्याक बनाउनुछ । तैपनि उनी जिम धाउँदैछन् ।
ज्यानको नसा नै फुलिनेगरी गह्रौं भार उठाउँदैछन् । अतिरिक्त बोसो पगाल्नेगरी जिउ तन्काउँदैछन् । चुस्त र तन्दुरुस्त देखिनेगरी पसिना चुहाउँदैछन् । किन ?
गगन थापाले सामाजिक सञ्जालमा राखेको भिडियो हेरेर कतिपयको मनमा यस्तै उत्सुकता जागिरहेको होला । कतिलाई लागेको होला, यो उमेरमा उनका लागि त योग, ध्यान, प्राणायाम बढी उपयुक्त हुँदो हो । प्रातकालीन भ्रमण, आधारभूत व्यायाम र अनुशासित खानपान पनि काफी हुँदो हो ।
यद्यपि गगन थापा यतिबेला थप जाँगरिला देखिएका छन् ।
त्यसो त जिम धाउनका लागि उमेरको कुनै हदबन्दी छैन । हड्डी पूर्णत विकास किशोरदेखि हड्डी कमजोर हुने बेलाका पाका मान्छे पनि जिम गए हुन्छ । मांसपेशी बलियो बनाउन, रक्त र वायुविकारबाट बच्न, बोसोतत्व पगाल्न जिम सर्वमान्य विकल्प हो ।
तर, यो बखान जिमको होइन । भलाद्मी ठाँटका नेता गगन थापाको हो । केही समयअघि निर्वाचनताका उनको एउटा फोटो भाइरल भएको थियो । कमसल फोटोले हो वा अरु नै कारणले, कपालको घनत्व घटेको र अनुहारको रङ उडेको देखिन्थ्यो ।
उबेला कसैले उनलाई सोधेका थिए, ‘आज सुत्न भ्याउनु भयो कि भएन ?’
गगनको जवाफ थियो, ‘तीन, साढे तीन घण्टा सुतियो । तर म सधैं बिहान चाडो उठ्ने बानी छ ।’ आफ्नो काय बुढ्यौलीतर्फ ढल्कदै गएको संकेत मिलेपछि पो उनलाई जिम धाउने झोंक चलेको हो कि ?
यो संशय भने उनको एक अन्तर्वार्ताले खारेज गरिदिएको छ । उनले अन्तर्वार्तामा आफ्नो विस्तृत दैनिकी बताएका छन् । बिहान उठेर छोरीहरूलाई विद्यालय पठाउनुअघि खेल्ने गरेका रहेछन् । र, त्यो भन्दा पनि अगाडि चाहिँ उनले व्यायाम गर्ने बताएका छन् । तपाईंको दिनचर्या कसरी सुरु हुन्छ ? भन्ने प्रश्नमा उनको पहिलो जवाफ छ, ‘बिहान उठेर मेरो शारीरिक व्यायम जे गर्नुपर्छ त्यो गरेर एकछिन छोरीहरूसँग समय बिताउँछु ।’
अर्थात व्यायम उनको जीवनको अनिवार्य हिस्सा हो । हुन त राजनीतिक व्यस्तताका कारण उनको दैनिकीमा केही तलमाथि पर्न सक्छ । तैपनि उनी सकेसम्म आफूलाई शारीरिक रुपले तन्दुरुस्त, ताजा एवं जाँगरिलो बनाउन व्यायम त गर्छन् नै ।
उनी शारीरिक रूपमा सक्रिय मात्र रहेनछन्, उत्तिकै रसिक पनि । आफ्नै मर्जीको दिन बिताउन पाएको बखत उनी पत्रिका पढ्छन् र टिभी हेर्छन् । त्यो भन्दा बढी सिनेमा घर धाउँछन् । श्रीमतीलाई साथमा लिएर फिल्म हेर्न जाने उनले बताएका छन् ।
बाहिरबाट हेर्दा उनको जीवन राजनीतिक धपेडीमा बितेजस्तो लाग्न सक्छ । तर, होइन रहेछ । उनी आफ्ना हितैषीसँग जमघट गर्दा रहेछन् । र, त्यहाँ राजनीति भन्दा बाहिरका मात्र कुरा गर्दा रहेछन् । यस्तै श्रीमती र छोरीहरूलाई लिएर रेष्टुरेन्ट जाँदा रहेछन् । तर, यसको कुनै तालिका भने हुँदैन । बेलामौकामा यस्तो भइरहन्छ ।
यी विवरणहरूले भन्छ, ‘गगन थापा जिम धाउनु कुनै आश्चर्यको कुरा होइन । यो उनको दैनिकीको एक अंश हो ।’ कलकलाउँदो ठिटोलेझैं अत्यन्तै फुर्तिसाथ उनले जिम वर्कआउट गरेको देखेर एक शुभेच्छुक लेख्छन्, ‘प्रिय गगन दाइ, तपाईंले फिटनेशप्रति देखाउनुभएको लगाव, समर्पण र निरन्तर मेहनतको म साँच्चै प्रशंसा गर्छु ।’
अर्का फेसबुक प्रयोगकर्ताको टिप्पणी यस्तो छ, ‘इतिहासले भन्छ शक्तिशाली मान्छेहरू शक्तिशाली ठाउँबाट आउँछन् । इतिहास गलत थियो, शक्तिशाली मान्छेहरूले ठाउँलाई नै शक्तिशाली बनाउँछन् ।’
यी तारिफ र ढाडस आफ्नो ठाउँमा छ । यद्यपि गगन थापाको फिटनेस शैली आफैँमा अनुकरणीय छ । लगभग ८ वर्षअघि गगन थापालाई सोधियो, ‘तपाईं कसरी फिट एन्ड फाइन देखिनुहुन्छ ?’
जवाफमा उनी भन्छन्, ‘तपाईं पत्यानुहुन्न होला । अहिले केही समस्याले छाडेको छु । नभए अरुदिन म नियमित शारीरिक व्यायम गर्छु । हप्तामा एक, दुई दिन फुटसल खेल्छु । अरू एक दिन दुई दिन वाक जाने कुरा भए मलाई पुग्छ जस्तो लागेको छ ।’
पछिल्लो फेसबुक भिडियोमा शुभेच्छुकले उनलाई सटिक सुझाव दिएका छन्, ‘आफ्नो शरीरलाई जस्तै पार्टीलाई पनि बलियो बनाउनु होला ।’
