वीरगंज । सबै कलाकारको सपना हुन्छ सिल्भर स्क्रिनमा देखिन पाउँ । मुख्य क्यारेक्टरमा अभिनय गर्न पाउँ । चर्चित नाम र चर्चित अनुहारको अलावा अन्य कलाकारको पहिचान बन्नलाई लामो समय लाग्छ । यस्तै केही कलाकार छन् जो फिल्ममा कहिले चौकीदारको भूमिका देखिए त कहिले साइड रोलमै बसेर आफ्नो पहिचान बनाउने कोशिश गरे । तीनै कलाकार जब ओटिटी (ओभर द टप) को दुनियाँमा प्रवेश गरे तब उनीहरुको भाग्य हिरा जसरी चम्किरहेको छ ।

पंकज त्रिपाठी

यो सूचीको पहिलो नम्बरमा आउँछन् पंकज त्रिपाठी । जस्तोसुकै भूमिकामा सहजै अभिनय गर्न सक्ने पंकजको क्षमता छ । दर्शकले उनको अभिनयलाई निकै रुचाउने गर्छन् । फुकरे फिल्ममा उनले कलेजको चौकीदारको रोलमा थिए । उनको उक्त रोलले अलग पहिचान दियो । त्यसपछि उनी चम्किए वेब सिरिज मिर्जापुरबाट । मिर्जापुरमा उनी एक ग्याङस्टार कालिन भैयाको भूमिकामा देखिएका छन् ।

अभिषेक बेनर्जी

स्त्री र ड्रिम गर्ल फिल्ममा साइड रोलमा देखिएका अभिषेकको खासै चर्चा भएन । तर उनको परिचय वेब सिरिज पाताल लोकले बदलिदियो । सिरिजमा उनी हथौडा त्यागीको भूमिकामा देखिएका छन् । उनको अभिनय दमदार छ ।

जितेन्द्र कुमार

जितेन्द्र कुमार आयुष्मान खुरानासँग फिल्म शुभ मंगल ज्यादा सावधानमा देखिएका थिए । तर उनको खासै चर्चा भएन । तर जब उनी वेब सिरिज पञ्चायतमा सचिवको भूमिकामा देखिए तब उनको चर्चा ह्वात्तै बढ्यो । यो सिरिज यति चर्चित भयो कि यसको दोस्रो सिजन पनि आइसकेको छ । सिरिजका पात्र सचिव र प्रधानलाई लिएर सामाजिक सञ्जालमा धेरै मिम्स पनि भाइरल भएको थियो ।

प्रतीक गान्धी

प्रतीक गान्धीको नाम चर्चामा तब आयो जब उनले स्केम १९९२ नामक वेब सिरिजमा देखिए । सिरिजमा मुख्य भूमिका देखिएका उनको अभिनयले धेरैको ध्यान खिच्यो । त्यसअघि उनी गुजराती सिनेमामा काम गर्दै आएका थिए ।

कीर्ति कुल्हारी

उरी द सर्जिकल स्ट्राइकदेखि पिंक तथा फिल्म इन्दु सरकारमा अभिनय गरेकी कीर्ति कुल्हारीको खास पहिचान ओटिटी मार्फत बन्यो । फोर मोर शट्स, बार्ड अफ ब्लड र क्रिमिनल जस्टिसपछि हालै रिलिज भएको ह्यूमनमा उनको अभिनयको निकै नै तारिफ भयो । कीर्ति ओटिटीमार्फत आफ्नो वास्तविक पहिचान बनाउन सफल भएकी छन् ।

श्वेता त्रिपाठी शर्मा

चर्चित फिल्म मसानमा छोटो तर उत्कृष्ट भूमिकामा देखिएकी श्वेता अहिले ओटिटीको दुनियामा गोलू गुप्ता बनिसकेकी छिन् । वेब सिरिज मिर्जापुरमा गोलू गुप्ताको भूमिकामा श्वेतो दमदार अभिनय देखाएकी छिन् । बलिउड र वेब सिरिजमा उनको डिमान्ड बढ्दै गइरहेको छ ।