वीरगंज | वाणिज्य, आपूर्ति तथा उपभोक्ता हित संरक्षण विभागले आयातकर्ता र उत्पादकमा अनुगमन सुरु गरेको छ ।आयातकर्ता र खुद्रा व्यापारीबीच सामानको मूल्य र गुणस्तरमा धेरै अन्तर देखिएपछि त्यसलाई रोक्न विभागले अनुगमन सुरु गरेको हो ।

भन्सार विन्दुमा अधिकतम खुद्रा बिक्री मूल्य (एमआरपी) तोकिएको सामानमा पनि मूल्य फरक–फरक पाइएपछि ती सामानमा केन्द्रित रहेर आयातकर्ताको अनुगमन सुरु गरिएको विभागले जानकारी दिएको छ । विभागका प्रवक्ता शिवराज सेढाईंले सामानको मूल्य, गुणस्तर र लेबल हेर्नका लागि आयातकर्ता र उत्पादकमा अनुगमन सुरु गरिएको जानकारी दिए । प्रज्ञापनपत्र, डिक्लेरेसन र खुद्रा बिक्री मूल्यबीचको तालमेल हेरिने उनले बताए ।

अनुगमनबाट आयातकर्ता र खुद्रा व्यवसायीबीचमा भएको मूल्य अन्तर पत्ता लाग्ने विभागले जनाएको छ । यसले गर्दा मूल्य भेरिफिकेसन हुने हुनाले एमआरपीभन्दा पनि बढी मूल्य लिएको फेला परे तत्काल कारबाही गर्न सकिने प्रवक्ता सेढाईंको भनाइ छ । आयातकर्ताले सामानको भन्सार शुल्क कम तिरेर बजारमा ल्याई उपभोक्तालाई महँगोमा बेच्ने गरेको गुनासो रहँदे आएको छ ।

सरकारले टेलिभिजन, एयर कन्डिसनर, रेफ्रिजेरेटर, वासिङ मेसिन, माइक्रो ओभन, इनर्जी ड्रिंक्स, मार्बल, ट्रायल, चिम्नी, डिजिटल क्यामरा, भिडियो क्यामरा र सवारीसाधनमा भन्सार विन्दुमै अधिकतम खुद्रा मूल्य (एमआरपी) निर्धारण गरेको छ । यी सामानमा एमआरपी लागू भएको छ कि छैन भनेर हेरिने विभागले जानकारी दिएको छ ।

एमआरपी तोकिएका सामानमा अनुगमन सुरु गरिएको विभागले बताएको छ । खरिद र बिक्री बिल हेरिने हुँदा यसले न्यून बिजकीकरणलाई पनि निरुत्साहन विभागको दाबी छ ।