वीरगंज | सुशान्त सिंह मुद्दामा मंगलबार पाँचौं अनुसन्धान एजेन्सीको पनि प्रवेश भएको छ । सिबिआई, ईडी, बिहार प्रहरी र मुम्बई प्रहरीपछि एनसीबी पनि यसमा समावेश भएको छ । प्रवर्तन निर्देशनालय (इडी) ले रियाको ह्वाट्सएपबाट डिलिट गरिएको च्याट सिबिआईका साथै नारकोटिक्स कन्ट्रोल ब्यूरो (एनसीबी) लाई सुम्पिएको छ । इडीले जुन च्याट दिएको छ, त्यसमा रिया चक्रवर्तीको लागूऔषधसँग सम्बन्ध भएको खुलासा भएको छ ।

रियाका च्याटका पाँच पात्र, जो लागूऔषधसँग जोडिएका छन्ः

केही रिपोर्टमा दाबी गरिए अनुसार रियाले लागूऔषधको सिलसिलामा गरिएको जुन च्याट डिलिट गरेकी छिन्, त्यो चार व्यक्तिसँग जोडिएको थियो ।

– पहिलो पात्र गौरव आर्या, जसलाई ड्रग डिलर बताइएको छ । उनीसँग रियाको कुरा सन् २०१७ मा भएको थियो । यसमा रियाले एमडीको माग गरिरहेकी थिइन् । रियाले सोधेकी थिइन्, ‘के तिमीसँग एमडी छ ?’

– दोस्रो पात्र जया साहा । जयासँगको च्याटको केही हिस्सा सार्वजनिक भएका छन् जसमा रियाले गत नाभेम्बरदेखि सुशान्तलाई कुनै लागूऔषध दिइरहेको शंका गरिएको छ । यस्तै, जयासँग रियाले १४ जून अर्थात् सुशान्तको मृत्युको खबर पाएलगत्तै अर्थात् दिउँसो करिब साढे दुई बजे कुरा गरेकी थिइन् ।

– तेस्रो व्यक्ति श्रुति र चौथो मिरान्डा हुन् । यी दुई श्रुति मोदी र स्यामुअल मिरान्डा हो होइनन् भनेर पुष्टि भइसकेको छैन ।

– स्यामुअलबारे सुशान्तका कुक निरजले पनि कुरा गरेका थिए कि उनले एक विशेष प्रकारको चुरोट ल्याउँथे । १३ जूनको राती सुशान्तले यो विशेष प्रकारको चुरोट पाएका थिएनन् ।

– पाँचौं पात्र रियाका भाई शोविक चक्रवर्ती हुन् । रिपोर्टका अनुसार जुन ड्रग्सको प्रयोग रियाले गरिरहेकी थिइन्, त्यो विशेषगरी हाई–प्रोफाइल पार्टीमा भेटिन्छ ।

डिलिट गरिएको च्याटमा यी कुराको खुलासाः

– रियाले डिलिट गरेको च्याट इडीले रिट्रिव गरेको हो । जसमा हार्ड ड्रग एमडीएमको कुरा गरिएको छ । यो पार्टी ड्रग हो जुन मुम्बईमा निकै सजिलै भेटिन्छ विशेषगरी बी टाउन पार्टी र रेव पार्टीमा पनि ।

– एक च्याटमा मिरान्डाले रियासँग भनेकी छिन्, ‘हेलो रिया सबै स्टक लगभग समाप्त भइसकेको छ ।’

– अर्को एउटा च्याटमा जया साहाले रियालाई भनेकी थिइन्, ‘पानी, चिया वा कफीमा चार थोपा मिसाएर उनलाई (सम्भवतः सुशान्तलाई) दिनु । त्यसपछि ४० मिनेट लाग्नेछ ।

वकिलको दाबीः रियाले कहिले पनि ड्रग्स लिएकी छैनन्

रियाका वकिल सतिश मानशिन्देले ड्रग्स कनेक्सनलाई पूर्ण रुपमा खारेज गरेका छन् । मानशिन्देले भनेका छन्, ‘रियाले कहिले पनि ड्रग्सको प्रयोग गरेकी छैनन् । रिया आफ्नो रगत परीक्षण गर्न पनि तयार छिन् ।’

इडीले सोधपुछको क्रममा जफत गरेको थियो ह्यान्डसेटः

अवैध धनलाई वैध बनाएको मामिलामा ईडीले रिया र उनको परिवारसँग सोधपुछ गरेको थियो । रियासँग एजेन्सीले दुईपटक सोधपुछ गरेको थियो । यतिबेला इडीले रियाका चारवटा मोबाइल जफत गरेको थियो । यीमध्ये दुई रियाका थिए । अन्य दुई आइप्याड र एक ल्यापटप पनि इडीले कब्जामा लिएको थियो । यी सबै विद्युतीय उपकरण अनुसन्धानका लागि फोरेन्सिक ल्याब पठाएका थिए । यति नै बेला यो मामिलामा ड्रग्सको सम्बन्ध भएको पनि खुलासा भएको बताइएको छ ।