वीरगंज | नेकपा (एमाले) की सांसद साजिदा खातुन सिद्दिकीले सरकारलाई चिट्ठामा रमाउने भनेपछि रास्वपा सांसद आशिका तामाङले आपत्ति जनाएकी छन् ।
आजको प्रतिनिधिसभा बैठकमा खातुनले सय दिन बितिसकोको भन्दै सय बुँदाको समीक्षा गर्न आग्रह गरिन् । उनले आफ्नो भूमिका खबरदारी गर्ने रहेको बताइन् ।
“चिट्ठामा रमाउने सरकार अब त आँखा खोल । जनताको पीडा बुझ, चमेली बन,” उनले भनिन् ।
खातुनले धारणा राखेपछि आशिका उठिन् । उनले आफूहरूलाई सांसद पद चिट्ठामा परेको भनिँदै आएकोमा आपत्ति जनाइन् ।
“हामीहरू चिट्ठामा परेको भन्नुभयो । उहाँले प्रुफ दिनुपर्यो । जनताले जिताएर आएको कि चिट्ठमा परेको उहाँले प्रुफसहित भन्नुपर्यो,” तामाङले भनिन् ।
उनले आफूहरू पनि अरु सांसदजस्तै जनताबाट जितेको भन्दै खातुनको अभिव्यक्ति रेकर्डबाट हटाउन माग गरिन् ।
त्यसपछि एमालेकी सांसद विष्णुमाया विकले सदनमा आवाज उठाउँदा व्यक्तिगत प्रश्न नभएको बताइन् ।
उनले संविधानअनुसार, सदनमा जनताको आवाज ढुक्क भएर राख्न नपाएको बताइन् ।
उनले सत्तापक्षले अनावश्यक रूपमा नियमापत्ति नभएको ठाउँमा नियमापत्ति गर्ने भन्दै आपत्ति जनाइन् । नियमापत्ति गर्दा ध्यान पुर्याउन आग्रह गरिन् ।
