वीरगंज । वीरगञ्ज महानगरपालिकाको सामुदायिक विद्यालयमा विद्यार्थीहरुका लागि दिवा खाजा कार्यक्रम रोकिएको छ। सरकारले सामुदायिक विद्यालयका कक्षा १ देखि ५ सम्मका विद्यार्थीका लागि दिवा खाजाको व्यवस्था गरेको छ।तर, वीरगञ्ज महानगरपालिकाको वडा नम्बर ३० स्थित लालपर्सा माविमा अध्यनरत विद्यार्थीले हालसम्म दिवा खाजा पाएका छैनन्। नयाँ आर्थिक वर्ष सुरु भएको डेढ महिना बितिसक्दासमेत उक्त विद्यालयका विद्यार्थीले दिवा खाजा पाएका छैनन्।

विद्यालयमा खाजा नहुँदा विद्यार्थीहरु टिफिनको समयमा घर जाने र झण्डै आधा विद्यार्थी नफर्कने विद्यालयमा अध्ययनरत विद्यार्थी मोताव देवानले बताए। लालपर्सा माविमा प्रधानाध्यापकसमेत लामो समयदेखि नरहेका कारण दिवा खाजासमेत प्रभावित भएको वडा नम्बर ३० का वडाध्यक्ष मनोजकुमार यादवको भनाइ छ। उनले प्रधानाध्यापक नभएकै कारणले विद्यालयको खाता नखुल्दा खाजा पनि बन्द भएको बताए।

यादवले महानगरको शिक्षा शाखामा आफूले बारम्बार विद्यालयमा प्रधानाध्यापक पठाइदिन आग्रह गरे पनि सुनुवाइ नभएको गुनासो गरे। पहिलो चौमासिकको रकम निकासामा समस्या भएकोले दिवा खाजा रोकिएको तर लालापर्सा माविमा चाँडै दिवा खाजा दिइने महानगरका शिक्षा शाखाका प्रमुख अरविन्द लाल कर्णले जानकारी दिए। सामुदायिक विद्यालयहरुमा विद्यार्थीहरुको संख्या घटदै गएपछि सरकारले दिवा खाजा कार्यक्रम विद्यार्थीहरुलाई टिकाइराख्नको लागि चलाएको छ। सरकारी तथ्यांकअनुसार यस कार्यक्रमले कक्षा एकदेखि पाँचसम्म विद्यार्थीको संख्या पनि बढेको थियो।