वीरगंज | गोरखा सदरमुकामको ऐतिहासिक मार्ग अर्थात् पीएन रोड (पृथ्वीनारायण मार्ग) अन्तर्गत गोरखा बसपार्कदेखि ठुलो आँगनसम्मको सडक एक हप्ताका लागि पूर्ण रूपमा बन्द गरिएको छ। सडक स्तरोन्नति तथा पूर्वाधार निर्माण कार्यलाई तीव्रता दिन उक्त सडक खण्डमा सवारीसाधन सञ्चालन अस्थायी रूपमा रोकिएको गोरखा नगरपालिकाले जनाएको छ।
सडक बन्द भएसँगै दैनिक आवतजावत गर्ने सर्वसाधारण, स्थानीय व्यवसायी, विद्यार्थी तथा पर्यटकलाई केही असुविधा हुने भए पनि निर्माण कार्य समयमै सम्पन्न गरी सुरक्षित, व्यवस्थित र गुणस्तरीय सडक उपलब्ध गराउने उद्देश्यले यो निर्णय गरिएको गोरखा नगरपालिकाका इन्जिनियर प्रकाश ढकालले बताउनुभयो।
गोरखाको ऐतिहासिक, धार्मिक तथा पर्यटकीय गन्तव्य पुग्ने मुख्य सडक भएकाले यसको मर्मतसम्भार गरी आन्तरिक तथा बाह्य पर्यटकलाई सहज बनाउन लागिएको उहाँले जानकारी दिनुभयो। निर्माण अवधिभर यात्रु तथा सवारी चालकलाई वैकल्पिक मार्ग प्रयोग गर्न नगरपालिकाले आग्रह गरेको छ।
गोरखाको इतिहास र पहिचानसँग जोडिएको पृथ्वीनारायण मार्ग पर्यटकीय तथा सांस्कृतिक दृष्टिले समेत महत्वपूर्ण सडक हो। यही मार्ग हुँदै गोरखा दरबार, भीमसेन पार्क लगायत ऐतिहासिक तथा धार्मिक स्थलमा पुगिने भएकाले निर्माण सम्पन्न भएपछि थप सहज हुने अपेक्षा गरिएको छ।
निर्माणस्थल वरपर अनावश्यक भीड नगर्न तथा ट्राफिक नियमको पूर्ण पालना गर्न आग्रह गर्दै ऐतिहासिक पृथ्वीनारायण मार्ग मर्मतसम्भारपछि आवागमन थप सुरक्षित र आकर्षक हुने विश्वास गरिएको छ।
भक्तपुरको जस्तै ढुंगा बिछ्याएर निर्माण भइरहेको यो सडकले गोरखा बजारको ऐतिहासिक मौलिकता र सांस्कृतिक सौन्दर्यलाई अझ उजागर गर्ने अपेक्षा गरिएको छ। परम्परागत स्वरूपमा संरक्षणसँगै पैदलयात्रीमैत्री, टिकाउ र व्यवस्थित सडक निर्माण भएपछि बजार क्षेत्रको पर्यटन प्रवर्द्धन र स्थानीय व्यापारमा समेत सकारात्मक प्रभाव पर्ने स्थानीयको विश्वास छ।
