वीरगंज | पश्चिम नवलपरासीको सुस्ता गाउँपालिकाले आगामी आर्थिक वर्ष २०८३/८४ का लागि शिक्षा, स्वास्थ्य, कृषि र पर्यटन विकासलाई मुख्य प्राथमिकतामा राखेर कुल ६० करोड ३२ लाख ७८ हजार रुपियाँको अनुमानित बजेट सार्वजनिक गरेको छ।

प्रमुख प्रशासकीय अधिकृत हुमलाल भुसालका अनुसार गाउँपालिकाको १९औँ गाउँसभामार्फत आगामी आर्थिक वर्षको नीति, कार्यक्रम तथा बजेट सार्वजनिक गरिएको हो। प्रस्तुत कुल बजेटमध्ये गाउँपालिकाले चालु खर्चतर्फ ३७ करोड ३१ लाख ७८ हजार रुपियाँ विनियोजन गरेको छ भने विकास निर्माण तथा पूर्वाधारतर्फ (पुँजीगत खर्च) २३ करोड १ लाख रुपियाँ अनुमान गरिएको छ।

गाउँपालिकाको बजेटको मुख्य स्रोतमा सङ्घीय सरकारतर्फ वित्तीय समानीकरण अनुदान १२ करोड ६ लाख, सशर्त अनुदान ५ करोड ६१ लाख, विशेष अनुदान १ करोड ५ लाख र समपूरक अनुदान १ करोड ५ लाख रुपियाँ रहेको छ। यस्तै, राजस्व बाँडफाँटबाट ११ करोड ५९ लाख ५१ हजार रुपियाँ प्राप्त हुने अनुमान गरिएको छ।

प्रदेश सरकारतर्फ समानीकरण अनुदान ८१ लाख ७४ हजार, सशर्त अनुदान ८० लाख, विशेष अनुदान २० लाख र समपूरक अनुदान ७५ लाख रुपियाँ प्राप्त हुने अनुमान छ। साथै, राजस्व बाँडफाँटतर्फ १ करोड ३ लाख ५१ हजार रुपियाँ र आन्तरिक स्रोतबाट १ करोड ५ लाख रुपियाँ संकलन गर्ने लक्ष्य राखिएको छ।

नीति तथा कार्यक्रमका मुख्य आकर्षण
‘सुस्तालाई चिनौँ र चिनाऔँ’ अभियान र शैक्षिक सुधार
शिक्षा क्षेत्रलाई थप गुणस्तरीय बनाउन ‘सुस्तालाई चिनौँ र चिनाऔँ’ अभियान अन्तर्गत कक्षा ५, ८ र १० का परीक्षालाई थप व्यवस्थित बनाउने नीति लिइएको छ। उत्कृष्ट नतिजा ल्याउने विद्यार्थी तथा उत्कृष्ट कार्य गर्ने शिक्षकलाई पुरस्कृत गरिनेछ। साथै ‘विद्यालयमा बढाऔँ, विद्यालयमै पढाऔँ’ कार्यक्रमलाई प्राथमिकताका साथ अघि बढाइने भएको छ।

‘विदेश हैन व्यवसाय’ र युवा स्वरोजगार
‘खेलसँगै जीवन हिँडाउँछु, पालिकालाई देशभर चिनाउँछु’ भन्ने नाराका साथ खेलाडीहरूलाई प्रोत्साहन गर्ने नीति लिइएको छ। युवालाई स्वदेशमै रोक्न ‘विदेश हैन व्यवसाय’ अभियानअन्तर्गत वैदेशिक रोजगारीबाट फर्केका युवालाई लक्षित गरी सीपमूलक तथा रोजगार कार्यक्रम सञ्चालन गरिने उल्लेख छ।

स्वास्थ्य क्षेत्रः १० शय्याको अस्पताल र सामाजिक सुरक्षा
स्वास्थ्यतर्फ वडा नं. २ मा निर्माणाधीन १० शय्याको अस्पतालको बाँकी काम अघि बढाइने भएको छ। ‘छोरी सुनौलो भविष्य’ कार्यक्रमलाई निरन्तरता दिँदै पालिकालाई पोषणमैत्री बनाउने, कुष्ठरोग तथा क्षयरोगका लागि स्वास्थ्य शिविर सञ्चालन गर्ने र ज्येष्ठ नागरिक स्वास्थ्य शिविरलाई प्राथमिकता दिइनेछ। सामाजिक सुरक्षाअन्तर्गत ‘उपाध्यक्षसँग सुत्केरी भेटघाट’ र ‘जनतासँग जनप्रतिनिधि’ कार्यक्रमलाई निरन्तरता दिइनेछ।

कृषिः दूधमा आत्मनिर्भर र किसानलाई अनुदान
‘दूधमा आत्मनिर्भर, निर्यातमा प्रवर्द्धन’ भन्ने नारासहित पशु सुत्केरी कार्यक्रमलाई निरन्तरता दिइने भएको छ। ‘कृषि उत्पादनमा वृद्धि, सुस्ताको समृद्धि’ अभियानअन्तर्गत किसानलाई उन्नत बीउबिजन, कृषि अनुदान तथा प्राविधिक ज्ञान विस्तारमा जोड दिइनेछ।

पर्यटन, खानेपानी र ‘उज्यालो सुस्ता’ अभियान
पर्यटन क्षेत्रतर्फ ऐतिहासिक तथा धार्मिक स्थलहरूको संरक्षण र प्रवर्द्धन गरी आन्तरिक तथा बाह्य पर्यटक आकर्षित गर्ने लक्ष्य राखिएको छ। पूर्वाधार तथा खानेपानीतर्फ ‘एक घर एक धारा’ अभियानमार्फत स्वच्छ खानेपानी उपलब्ध गराइने प्रतिबद्धता जनाइएको छ।

त्यस्तै, ‘हाम्रो सुस्ता, उज्यालो सुस्ता’ अभियानअन्तर्गत वडा नं. १ देखि ५ सम्मका सार्वजनिक तथा संवेदनशील स्थानमा सडक बत्ती (स्ट्रीट लाइट) जडान गर्ने कार्यक्रमलाई प्राथमिकता दिइएको छ।