वीरगञ्ज । मनोसामाजिक समस्याले पीडित एक महिलाले आफ्नो शरीरमा आगो लगाएर आत्महत्या गरेकी छन् । बाराको जितपुरसिमरा उपमहानगरपालिका – ७ स्थित जितपुरको रामटोलकी ५५ वर्षीय बिन्दा देवीले आफ्नो शरीरमा आगो लगाएर आत्महत्या गरेकी हुन् । बारा प्रहरीका अनुसार गम्भीर रूपले घाइते भएकी बिन्दाको उपचारका क्रममा मृत्यु भएको छ ।

लामो समयदेखि मनोसामाजिक समस्याले पीडित बिन्दाले बिहीबार बेलुका आफ्नै घरको कोठामा आफैले शरीरमा आगो लगाएको इलाका प्रहरी कार्यालय सिमराका प्रमुख प्रहरी नायव उपरीक्षक (डिएसपी) प्रदीप बहादुर क्षेत्रीले जानकारी दिए । आगोले जलेर गम्भीर रूपले घाइते भएकी बिन्दालाई उपचारका लागि तत्कालै वीरगञ्ज ल्याइएको थियो । तर यहाँ पनि उनको उपचार हुन नसकेपछि चिकित्सकहरूले काठमाडौँ लिएर जान सुझाव दिएका थिए । काठमाडौँ लग्ने क्रममा बाटोमै उनको मृत्यु भएको डिएसपी क्षेत्रीले बताए ।

बिन्दाको शव हाल पोस्टमार्टमका लागि वीरगञ्जस्थित नारायणी अस्पतालमा राखिएको छ । घटनाको विषयमा प्रहरीको अनुसन्धान जारी रहेको डिएसपी क्षेत्रीको भनाई छ ।