वीरगंज । झापाको कन्काई माईमा दाहसंस्कार गर्न लागिएको अवस्थामा एक महिलाको शव प्रहरीले सोमबार अपराह्न चिताबाटै उठाएको छ। इलाका प्रहरी कार्यालय अनारमनीको प्रहरीको टोलीले चितामा राखेर दागबत्ती दिन ठिक्क पारेको अवस्थामा महिलाको शव चिताबाटै उठाएको हो। कन्काई नगरपालिका–३ निवासी ३२ वर्षीया पूजा कोचकारको सोमबार दिउँसो मृत्यु भएपछि परिवारले अन्त्येष्टिका लागि उनको शव कन्काई माईमा पुयाएका थिए। तर, प्रहरीले घाटबाटै शव उठाएर पोष्टमर्टमका लागि मेची प्रादेशिक अस्पताल भद्रपुर पठाएको हो।
इलाका प्रहरी कार्यालय अनारमनीका प्रहरी नायब उपरीक्षक सुरज कार्कीले स्थानीयवासीको मौखिक उजुरीका आधारमा शव नियन्त्रणमा लिँदै पोष्टमर्टमका लागि अस्पताल पठाइएको जानकारी दिए। कन्काई–३ निवासी ५० वर्षीय चोपेन्द्र कोचकारका दुई जना श्रीमती रहेको र मृतक पूजा उनकी कान्छी श्रीमती भएको बताइएको छ। प्रायस्जसो घरमा झैझगडा भइरहने र जेठी श्रीमती तथा उनका श्रीमानको कुटाइबाट उनको मृत्यु भएको हुनसक्ने भन्दै स्थानीयवासीले प्रहरीलाई खबर गरेको बताइएको छ।
‘स्थानीयवासीको मौखिक उजुरीका आधारमा पूजाको शव परीक्षणका लागि लगिएको हो’, प्रहरी नायब उपरीक्षक कार्कीले भने। पूजाको विर्तामोडस्थित कञ्चनजङ्घा अस्पतालमा उपचारका क्रममा निधन भएको बताइएको छ। उनका श्रीमान चोपेन्द्र ठेक्कापट्टाको काम गर्दै आएको जनाइएको छ। चोपेन्द्रको परिवारमा यसअघि दुई श्रीमती र श्रीमानबीच मादक पदार्थ खाएको विषयमा झैझगडा हुँदै आएको स्थानीयवासीले बताएका छन् । मृतक पूजाका १० वर्षका एक छोरा रहेका छन् । घटनाका विषयमा प्रहरीले अनुसन्धान सुरू गरेको प्रहरी नायब उपरीक्षक कार्कीले बताए।
