वीरगन्ज | वीरगन्ज महानगरपालिका वडा नम्बर ३० का वडाध्यक्ष मनोज कुमार यादवले आफनो वडामा रहेका तीन वटै सामुदायिक विधालयमा अध्ययनरत विधार्थीहरुलाई पाँचवर्ष सम्म निशुल्क शैक्षिक सामाग्री उपलब्ध गराउने घोषणा गरेका छन् । यो घोषणासंगै यादवले मंगरबार ती तीन वटै विधालयमा अध्ययनरत विधार्थीहरुलाई चालु शैक्षिकसत्रका लागि आवश्यक पर्ने कपी र कलम पनि वितरण गरेका छन् । वडा नम्बर ३० को लालपर्सामा नेपाल राष्ट्रिय आधारभूत विधालय , प्रसुतिपुरमा नेपाल राष्ट्रिय प्राथमिक विधालय र मुस्लिम समुदायका बालबालिकाहरु पढ्ने इस्लामिया मदर्शा गरि तीन वटा सामुदायिक विधालय छन् । ती विधालयहरुमा गरि कुल १ हजार २ सय विधार्थी अध्ययनरत छन् ।

तीन वटै विधालयहरुमा अध्यनरत कक्षा १ देखि ८ सम्मका सबै विधार्थीहरुलाई आफनो कार्यकालभरि वडा कार्यालयबाट निशुःल्क शैक्षिक सामाग्री (कपी , कलम , स्कुल ब्याग इत्यादि) उपलब्ध गराउने निर्णय गरिएको वडाध्यक्ष यादवले बताए । सोही निर्णय अनुरुप मंगलबार तीन वटै विधालयमा पुगेर विधार्थीहरुलाई शैक्षिक सामाग्री वितरणपनि गरिएको जानकारी उनले दिए । यादवले भने,‘ किताब र पोशाक सरकारले नै निशुल्क दिदै आएको छ , त्यो बाहेक कापी , कलम , स्कुल ब्याग इत्यादि शैक्षिक सामाग्री मेरो कार्यकालभरि अर्थात ५ वर्षसम्म वडाको बजेटबाट निशुल्क उपलब्ध गराइन्छ ।

उनले थपे,‘ सरकारी विधालयमा एक त अधिकांश गरिब विपन्नका बालबालिकाहरु नै पढ्छन् , त्यसमा पनि कापी कलम किन्न पैसा छैन भनेर कतिपय अभिभावकले बालबालिकालाई विधालय नै पठाउदैनन् , तीनै बालबालिकालाई लक्षित गरि मैले यो काम थालेको हुँ । यस्तै लालपर्सामा रहेको आधारभूत विधालयमा मावि तहको कक्षा सन्चालनका लागि महानगरपालिकाबाट अनुमति पनि पाउन सफल भएको वडाध्यक्ष यादवले जानकारी दिए । मावि तहको कक्षा सन्चालनका लागि अनुमति पाएसंगै तत्कालका लागि कक्षा ९ को पठपाठन पनि सुरु गर्ने तयारीमा लागेको उनले बताए ।

वडाअध्यक्ष यादवले भने,‘ यहि विधालयमा म आफैपनि ५ कक्षा सम्म पढेको हुँ , त्यसबेला ५ कक्षा पास गरेपछि कक्षा ६ देखि माथिको पढाई गर्न ३ किलोमिटर पैदल हिडेर परवानीपुरको विधालयमा जानु परेको थियो , त्यहिबेला देखि मेरो मनमा यो पिडा खिल बनेर बसेको थियो , तर आज मेरो त्यो सपना पनि पुरा भएको छ । वडाध्यक्ष यादवले आफनो कार्यकालमा शिक्षा र स्वास्थ्य यी दुइ क्षेत्रको सुधार र स्तरोन्नत्तीका लागि कुनै सम्झौता नगर्ने प्रतिबद्धता पनि जनाए । उनले भने,‘ शिक्षा र स्वास्थ्य यी दुई क्षेत्र मेरो पहिलो र मुख्य प्राथमिकतामा छ , अरु शीर्षकको बजेट कटौती गरेर भएपनि यी दुई क्षेत्रको सुधार र विकासमा म लागिरहन्छु । मंगलबारको शैक्षिक सामाग्री वितरण कार्यक्रममा वडा सदस्यहरु शयदा खातुन , जंग बहादुर राउत, न्यु नमूना युवा क्लबका अध्यक्ष गगन राउत अहिर , समाजवादी युवा संघका जिल्ला सदस्य विकास मण्डल , सुजित ठाकुर लगायतको पनि उपस्थिती थियो ।