वीरगंज । औरही गाउँपालिकामा आइतबारदेखि चारदिने चौबिस कुण्डीय नवचेतना जागरण गायत्री महायज्ञ शुरु भएको छ । उपराष्ट्रपति रामसहायप्रसाद यादवले आइतबार आयोजित एक समारोहबीच गायत्री महायज्ञको उद्घाटन गरेका छन् । समारोहमा उपराष्ट्रपति यादवले महामन्त्र, वेदमन्त्र, गायत्री मन्त्रको उपासनाका साथ हुने अश्वमेघ महायज्ञले जीवन र अध्यात्मको महत्व दर्शाइ मानिसमा अनुशासन कायम गर्ने विश्वास व्यक्त गरे ।

‘यस पवित्र भूमिमा गरिएको गायत्री महायज्ञको प्रभावले मानिसको अन्तरहृदयमा प्रेम, एकता, सहयोग, सद्भाव, इमान्दारिता, सदाचार अझ बढ्ने विश्वास लिएको छुँ ।’,उनले भने । त्यसैगरी उद्घाटन समारोहमा सिरहा क्षेत्र नं २ का प्रतिनिधिसभा सदस्य राजकिशोर यादवले गायत्री महायज्ञले मातृशक्तिको महत्वबारे जागरण फैलाउने धारणा राखे । ‘ महिला शिक्षित हुँदा परिवार, समाज तथा देशमा दिगो शान्ति स्थापना हुन्छ । यस महायज्ञले प्रवाह गर्ने अध्यात्मिक चेतनाले पर्यावरणको महत्वलाई पनि सुदृढ बनाउनेछ भन्ने मेरो विश्वास छ।’,उनले प्रष्ट पारे ।

महायज्ञ आयोजक समितिका संयोजक तथा औरही गाउँपालिकाका अध्यक्ष शिवजी यादवले गायत्री मन्त्रोच्चारणसहित हुने महायज्ञले मानिसमा अध्यात्मिक चिन्तन बढ्ने र समाजमा सकारात्मक परिवर्तन आउने विश्वास व्यक्त गरे । महायज्ञको पहिलो दिन आइतबार हजारौँको सँख्यामा महिलाहरुले कलश यात्रा गरेका थिए । यात्रामा नगर तथा छिमेकी राष्ट्र भारतबाट समेत ठूलो संख्यामा महिलाको सहभागिता रहेको थियो । महायज्ञ चार दिनसम्म सञ्चालन हुनेछ । औरही गाउँपालिका भारतीय सीमावर्ती नजिक भएको हुनाले दुबै देशका हिन्दू धर्मावलम्बीहरुको महायज्ञको दर्शन गर्न भीड लागेको छ । महायज्ञमा नेपाल भारतका विभिन्न स्थानबाट साधुसन्तहरुको सहभागिता समेत रहेको जनाइएको छ ।