वीरगन्ज ।यस साता नेपाल स्टक एक्सचेन्ज (नेप्से)मा ६४ अर्बको सेयर कारोबार भएको छ । राष्ट्र बैंकले मौद्रिक नीति जारी गर्ने दिन नजिकिँदै गर्दा लगानीकर्ताले समेत यस साता पर्ख र हेरको रणनीति अपनाएको देखिन्छ । गत साताको तुलनामा यस साता कारोबार रकम र सूचक दुवै सुस्त देखिएको छ ।

राष्ट्र बैंकको मौद्रिक नीति सार्वजनिक गर्ने तयारी गरिरहेका बेला संसद्को अर्थ समितिले पुँजी बजारमा नकारात्मक प्रभाव नपर्नेगरी मौद्रिक नीति तर्जुमा गर्न केन्द्रीय बैंकलाई निर्देशन दिएपछि अबको बजारमा अझै सुधार हुने अपेक्षा गरिएको छ । यद्यपि, असारमा करेक्सन आएको बजारमा साउन लागेसँगै सुधारोन्मुख देखियो ।

बैंकमा रहेको अधिक तरलता, सस्तो ब्याजदर र सेयर बजारको प्रमुख सिजन सुरु हुनुलगायतका कारणले बजारमा उत्साह देखिएको जानकार बताउँछन् । सातामा केही करेक्सन आए पनि नेप्सेले अझै माथिल्ला बिन्दुहरू तय गर्ने अनुमान गरिएको छ ।

साताभर ६४ अर्बको सेयर कारोबार

नेप्से सूचकसँगै कारोबार रकममा समेत वृद्धि आएको यो साता २ सय ३४ कम्पनीको ६४ अर्ब ५२ करोड ८७ लाख २१ हजार १ सय १३ रुपैयाँबराबरका १३ करोड १० लाख २४ हजार ८ सय ७१ कित्ता सेयर कारोबार भएका छन् । गत साता नेप्से सूचकसँगै २ सय ३५ कम्पनीको ६७ अर्ब ७४ करोड ६ लाख ४९ हजार १ सय ५९ रुपैयाँबराबरका १६ करोड ७५ लाख ६६ हजार १ सय १४ कित्ता सेयर कारोबार भएका थिए । त्यस्तै, बजार पुँजीकरण ४२ खर्ब ८४ अर्ब १६ करोडबाट बढेर ४३ खर्ब ३७ अर्ब १० करोड ३० लाख ६० हजार पुगेको छ ।

साताको पाँच दिन कारोबार भएको सेयर बजारमा लगातार चार दिन बढ्दा एक दिन मात्रै घटेको हो । साताको पहिलो दिन आइतबार ३ हजार ७९ दशमलव ८३ को बिन्दुबाट सुरु भएको नेप्से सूचक १ दशमलव २५ अंकले बढेर ३ हजार ८१ दशमलव शून्य ६ कोे बिन्दुमा आइपुगेको थियो । सोमबार भने ४ दशमलव शून्य ६ अंकले बढेको बजारमा मंगलबार भने २६ दशमलव शून्य २ अंकको वृद्धि देखिएको हो ।

साताको चौथो दिन बुधबार १२ दशमलव शून्य ५ अंकले बढेर साताकै उच्च बिन्दु ३ हजार १ सय २३ दशमलव १५ को बिन्दुमा आइपुगेको हो । साताको अन्तिम दिन बिहीबार भने बजारमा करेक्सन आएको थियो यस दिन १६ अंकले बजार घटेर ३ हजार १०७ दशमलव ४५ को बिन्दुमा आइपुगेको हो । साताभर उतारचढाव आएको बजारमा नेप्से सूचक गत साताको अन्तिम दिनको तुलनामा २७ दशमलव ६२ अंकले मात्रै बढेको छ ।

यस साता नेप्सेमा पाँचवटा कम्पनीको बोनस सेयर र दुईवटा कम्पनीको प्राथमिक सेयर सूचीकृत भएको छ । फरवार्ड कम्युनिटी माइक्रोफाइनान्सको १२ लाख ५१ हजार ३८ दशमलव ५० कित्ता सेयर रहेको छ । त्यसैगरी, रिलायन्स फाइनान्सको ८ लाख ३२ हजार ४१६ दशमलव शून्य ६ कित्ता, प्रुडेन्सियल इन्स्योरेन्सको ८ लाख २१ हजार १४५ दशमलव ६० कित्ता, नाडेप लघुवित्तको ३ लाख ६८ हजार कित्ता र मिथिला लघुवित्तको १ लाख ४६ हजार ८९ दशमलव शून्य १ कित्ता बोनस सेयर नेप्सेमा सूचीकृत भएका छन् भने मनकामना स्मार्ट लघुवित्त वित्तीय संस्थाको १२ लाख ११ हजार ५ सय कित्ता र युनियन लाइफ इन्स्योरेन्स कम्पनीको २ करोड १५ लाख कित्ता प्राथमिक सेयर नेप्सेमा सूचीकृत भएका छन् ।

त्यस्तै ‘क’ वर्गका कम्पनीहरूको कारोबार मापन गर्ने सेन्सेटिभ परिसूचक गत साताको अन्तिम दिनको तुलनामा ८ दशमलव १५ अंकले बढेको जनाइएको छ ।