वीरगंज | जनकपुरधाम – मधेस प्रदेश सरकारले अत्यावश्यक कामबाहेक बालबालिकालाई घरबाहिर जान नदिन अभिभावकहरूलाई अपील गरेको छ।

विभिन्न जिल्लामा भइरहेको प्रदर्शनमा बालबालिका सहभागी भइरहेकोमा चिन्ता व्यक्त गर्दै आफ्ना छोराछोरीलाई कुनै पनि उक्साहट, अफवाह, उत्तेजना वा हिंसात्मक गतिविधिमा सहभागी हुन नदिन मधेस सरकारले आग्रह गरेको हो।

‘हाल मधेस प्रदेशका केही स्थानमा देखिएको साम्प्रदायिक तनाव तथा हिंसात्मक घटनाका क्रममा सडक प्रदर्शन, जुलुस र भीडमा कलिला बालक तथा युवाहरूको संलग्नता बढिरहेकोप्रति प्रदेश सरकार अत्यन्त चिन्तित छ,’ गृह मन्त्रालयले भनेको छ,’कृपया आफ्ना छोराछोरीलाई कुनै पनि उक्साहट, अफवाह, उत्तेजना वा हिंसात्मक गतिविधिमा सहभागी हुन नदिनुहोस्। अत्यावश्यक कामबाहेक घरबाहिर नपठाउनुहोस्, उनीहरूको गतिविधिमा निगरानी राख्नुहोस् र सामाजिक सञ्जालमा फैलिने भ्रामक तथा भड्काउ सूचनाबाट सचेत गराउनुहोस्।’

बिहीबार सिरहामा प्रदर्शनको क्रममा गोली लागेर एक किशोरको मृत्यु भएको थयो भने जनकपुरधाममा घाइते भएका एक बालकलाई बिहीबार राति नै उपचारका लागि काठमाडौँ पठाइएको थियो।