वीरगंज संजालविराटनगर | प्रदेश-१ का दुई फरक फरक पीसीआर परीक्षण केन्द्रमा गरिएको एकै व्यक्तिको स्वाब परीक्षण रिपोर्ट फरक फरक आएको छ। विराटनगर-१ का ६३ वर्षीय रमेश अग्रवाललाई बिहीबार स्वास्थ्यमा समस्या देखिएपछि परिवारले कोशी अस्पताल पुर्याए। अग्रवाल मृगौला रोगी पनि थिए। ज्वरो र स्वासप्रस्वासमा केही समस्या आएपछि स्वास्थ्यकर्मीले कोरोना आशंकामा उनको फिवर क्लिनिकबाट स्वाब संकलन गरेर केही औषधीको साथमा घर पठाए।
स्वाब दिएका अग्रवालको पीसीआर रिपोर्ट नआउँदै शुक्रबार स्वास्थ्यमा थप समस्या देखिएपछि परिवारले विपी कोइराला स्वास्थ्य विज्ञान प्रतिष्ठान धरान पुर्याए। धरानमा इमरजेन्सीमा भर्ना गरी प्रतिष्ठानले कोरोना जाँच गर्न पुःन स्वाब संकलन गर्यो। त्यस समयसम्म उनको विराटनगरबाट रिपोर्ट आएको थिएन। उपचारकै क्रममा उनको शनिबार धरानमा मृत्यू भयो।
रमेशको मृत्यूपछि विराटनगर र धरान दुबै तर्फबाट पीसीआर रिपोर्ट त आयो तर, फरक फरक। विराटनगरमा लिएको स्वाबको रिपोर्ट पोजिटिभ आउँदा धरानमा लिएको स्वाबको रिपोर्ट भने नेगेटिभ आएको छ। धरानमा प्रतिष्ठानले संकलन गरेको स्वाबको नेगेटिभ रिपोर्ट आएपछि प्रतिष्ठानले रमेशको शव आफन्तको जिम्मा लगाइदियो र उनको अन्त्येष्टि पनि शनिबारनै आफन्तले गरिसकेका छन्।
फरक फरक रिपोर्ट आएपछि केही समय अन्त्येष्टि र शव बुझ्ने क्रममा विवाद भए पनि विराटनगर महानगरले थोरै मलामी उपस्थित गराउने सर्तमा आफन्तलाई अन्त्येष्टि गर्न दिएको विराटनगर महानगरपालिकाका जनस्वास्थ्य महाशाखा प्रमुख रमेश कार्कीले बताए। ‘एउटै व्यक्तिको २४ घण्टा नबित्दै परीक्षण गर्दा फरक रिपोर्ट आएपछि शव नेपाली सेनाले अन्त्येष्टि गर्नेकी भन्ने पनि थियो। अन्त्यमा थोरै मलामी सहभागी हुने भनेपछि र दोस्रो रिपोर्ट नेगेटिभ आएकाले शव आफन्तलाई दिएको हो’ कार्कीले भने।
मृतकको रिपोर्ट फरक आए पनि मृतकका आफन्तको पीसीआर जाँच गर्ने महानगरले तयारी गरेको छ। कार्कीले कहिले काँही पीसीआरमा यस्तो समस्या आउने भन्दै यसलाई सामान्य रुपमा लिए। ‘२५ प्रतिशतमा नदेखिने समस्या पनि आउन सक्छ, हामी परिवारको पनि परीक्षण गछौँ’ उनले भने। प्रदेश जनस्वास्थ्य प्रयोगशाला विराटनगरका सूचना अधिकारी प्रकाश कार्कीले स्वाब संकलनमा ध्यान नदिए रिपोर्ट फरक आउन सक्ने बताए। ‘स्वाब संकलन राम्ररी नभए यस्तो रिजल्ट आउने समस्या हुन्छ,’ उनले भने ‘यस विषयमा अध्यायन गर्नुपर्छ।’
