एजेन्सी । चिनियाँ राष्ट्रपति सी चिनफिङ शुक्रबार (आज) भारत भ्रमणमा जँदैछन् । दुई दिने भ्रमणका लागि भारत जान लागेका सी भारतीय समयअनुसार दिउँसो साढे दुई बजे चेन्नई एयरपोर्टमा अवतरण गर्ने भारतीय मिडियाले जनाएका छन् ।

साढे दुई बजे एयरपोर्ट पुग्ने राष्ट्रपति सीसँग बिहान ११ बजे चेन्नई पुग्ने भारतीय प्रधानमन्त्री नरेन्द्र मोदीले बेलुका पाँच बजे भेटवार्ता गर्नेछन् । त्यसपश्चात् दुई शीर्ष नेताहरु एउटा सांस्कृतिक कार्यक्रममा सहभागी हुने कार्यक्रम तय भएको भारतीय मिडियाले समाचारहरुमा जनाएका छन् ।

हिन्दुस्थान डटकमले भारतले सीको स्वागतका लागि भव्य तयारी गरेको समाचार प्रकाशित गरेको छ । भेटका अवसरमा राष्ट्रपति सीले प्रधानमन्त्री मोदीलाई विशेष उपहार दिने तयारी गरेको चिनियाँ विदेश मन्त्रालयलाई उद्धृत गर्दै समाचारमा जनाइएको छ । सीले मोदीलाई विशेष उपहार दिने र त्यसले दुई देश र दुई नेताबीचको मित्रतालाई उजागर गर्नै हिन्दुस्थान डटकमको टिप्पणी छ ।

भारत भ्रमणलगत्तै सीले नेपाल भ्रमण गर्ने तय भएको छ । शुक्रबार भारत जाँदै गरेका सी शनिबार नेपाल भ्रमणमा आउने कार्यक्रम तय भएको छ । नेपाल भ्रमणका क्रममा सीले गर्ने घोषणालाई भारतले महत्वका साथ हेर्ने जागरण डटकमले समाचार प्रकाशित गरेको छ ।

पछिल्लो समय चिनका राष्ट्रपतिको पहिलो नेपाल भ्रमण भएको उल्लेख गर्दै जागरण डटकमले नेपालमा स्थीर सरकार बनेपछिको भ्रमण भएको उल्लेख गरेको छ । नेपाल सरकारले चीनसँगको सम्बन्धलाई प्रगाढ बनाउन प्रयास गरिरहेको अवस्थामा सीको भ्रमण हुन लागेको उक्त समाचारमा जनाइएको छ ।

चीनले पहिले नेपालसँग सडक र रेलमार्गद्वारा जोड्ने बताएको उल्लेख गर्दै सी को भ्रमणका समयमा त्यसको घोषणा हुनसक्ने समाचारमा अनुमान गरिएको छ । यस्तो घोषणा भारतका लागि चिन्ता गर्नुपर्ने विषय भएको पनि समाचारमा जनाइएको छ ।

शुक्रबार भारत जान लागेका चिनियाँ राष्ट्रपति सी शनिबार नेपाल भ्रमणमा आउने र उनले प्रधानमन्त्री केपी ओलीसँग महत्वपूर्ण बैठक गर्ने बिबिसी हिन्दीले समाचार प्रकाशित गरेको छ ।

भारतमा सीको स्वागतका लागि तयारी भइरहेको तस्विरहरु सामाजिक सञ्जालमा आइरहेका छन् । जसमा पृष्ठभूमिमा राष्ट्रपति सीको तस्विर राखेर चिनियाँ भाषामा ‘स्वागतम’को आकारमा विद्यार्थीहरु रातो पहिरनमा सीको मास्क लगाएर बसेका छन् । त्यसैगरी, ‘स्वागतम’को ठिक अगाडी पहेलो रंगमा अंग्रेजी भाषामा ‘हार्ट्ली वेलकम’ लेखिएको छ ।

चेन्नाई विमानस्थलमा सुरक्षा व्यवस्था कडा पारिएको भारतीय सञ्चारमाध्यमले बताएका छन् । विमानस्थलको वरीपरी भारत र चीनको झण्डा फहराइएको छ ।