वीरगंज । प्रभु बैंकको दिक्तेल शाखा खोटाङका प्रबन्धक होमराज खतिवडा ग्राहकको पैसा सापटी लिएर महिना दिनअघिदेखि सम्पर्कविहीन बनेका छन्।
खोटाङको दिक्तेल–रूपाकोट–मझुवागढी नगरपालिका– ३ बाम्राङ घर भएका प्रभु बैंकका प्रबन्धक खतिवडा चिनजानका साथीभाइसँग लाखौँ पैसा सापटी लिएर फागुन १ गतेदेखि सम्पर्कविहीन बनेका हुन्।
प्रबन्धक खतिवडाले दर्जनौँ व्यक्तिको पैसा सापटी लिएको खुलेको छ। खतिवडा सम्पर्कविहीन बनेपछि उनलाई पैसा सापटी दिने व्यक्तिहरू फसेको भन्दै अतालिन थालेका छन्।गत माघ मसान्तसम्म बैंकको शाखा कार्यालय दिक्तेलको सम्पर्कमा रहेका खतिवडा अहिलेसम्म सम्पर्कमा आएका छैनन्। प्रबन्धक खतिवडाले सापटी भनेर रु. दश लाख लिएकोमा रु. पाँच लाख फिर्ता गरेर बाँकी रु. पाँच लाख फिर्ता नगरी सम्पर्कविहीन बनेको दिक्तेल–रूपाकोट–मझुवागढी नगरपालिका– १ दिक्तेलका काशीराज बस्नेतले बताए।
‘प्रबन्धक खतिवडा मेरै स्कुले साथी हुनुहुन्छ। धेरैपटक उहाँले हामीसँग व्यवहार गर्नुभएको थियो,’ उनले भने, ‘पछिल्लो समय पैसा फिर्ता नगरी एकाएक उहाँ सम्पर्कविहीन हुनुभयो । सँगै पढेको साथीले यस्तो गरेपछि दुःख लागेको छ।’ प्रबन्धक खतिवडाले एउटै व्यक्तिबाट रु. १६ लाखसम्म सापटी पैसा लिएको खुलासा भएको छ। खतिवडाले कतिपयलाई चेक दिएर पैसा सापटी लिएको पाइएको छ। उनले खातामा पैसा भएको ग्राहकलाई छानेर बैंकमै बोलाएर तथा नजिक घर भएका व्यक्तिलाई घरमै गएर पैसा सापटी माग्ने गरेको पीडितहरूले बताएका छन्।
प्रबन्धक खतिवडाले केही दिनमा फिर्ता गर्ने गरी भतिजोलाई अस्ट्रेलिया पठाउन तयार पारेको पैसा सापटी लिएर सम्पर्कविहीन बनेको दिक्तेल–रूपाकोट–मझुवागढी नगरपालिका–सोल्माका गंगाबहादुर विश्वकर्माले बताए।
‘प्रबन्धक खतिवडाले खातावालाकै नाममा चेक काट्न लगाएर बैंकबाट पैसा झिक्नुहुन्थ्यो। मेरो ओडी खाता हेरेर रु. तीन लाख सापटी मागेपछि दिएँ। चार-पाँच दिनपछि फेरि बैंकमा बोलाउनुभयो,’ उनले भने, ‘फेरि मेरै नाममा काटेको रु. तीन लाखको चेक लैजानुभयो । नदिऊँ भने बैंकको हाकिम, कसरी नदिनु ! सबै लोनको काम गर्दिरहेको छ। त्यो विश्वासले गर्दा आफ्नै नाममा चेक काटेर दिएँ । अहिले आएर फसेँ !’
प्रबन्धक खतिवडा सम्पर्कविहीन बनेपछि कोठा, घर र प्रभु बैकको प्रदेश कार्यालय, विराटनगरसम्म पुगेर कुरा राखेको विश्वकर्माले बताए। उनले चिनजानका व्यक्तिबाट रु. एक करोडभन्दा बढीको हाराहारीमा पैसा सापटी लिएको अनुमान गरिएको पीडितले बताएका छन्।
प्रबन्धक खतिवडाले सोही बैंकको कार्यालय रहेको घरका घरधनी इन्द्रकुमार श्रेष्ठ र उहाँका छोरा उद्धव श्रेष्ठको रु. दुई लाख ८७ हजार सापटी लिएर फिर्ता नगरेको इन्द्रकुमारका जेठा छोरा ध्रुव श्रेष्ठले बताए।
‘प्रबन्धक खतिवडाले हाम्रो परिवारबाट त्यसअघि पनि पटक–पटक सापटी पैसा चलाउनुहुन्थ्यो। बैंकका प्रबन्धकले भनेपछि दिनैपर्याे। उहाँ आफ्नै जिल्लाका स्थानीय बासिन्दा पनि हुनुहुन्छ,’ उनले भने, ‘बैंककै प्रबन्धकले यस्तो गर्नुहुन्छ भन्ने लाग्दैनथ्यो। अहिले धेरैको पैसा चलाएर फिर्ता नगरी सम्पर्कविहीन भएको सुन्नमा आएको छ।’
प्रबन्धक खतिवडाले व्यापारीदेखि आफ्नै सहकर्मी तथा आफन्तसँग पनि पैसा सापटी लिएको बताइएको छ। प्रबन्धक खतिवडालाई सम्पर्क गर्दा उनको मोबाइल नम्बर अफ छ। उनले बैंकको रकम भने छोएका छैनन्।
शाखा प्रबन्धक खतिवडा सम्पर्कविहीन बनेको केही समयपछि प्रभु बैंकले सो स्थानमा दीपक खत्रीलाई पठाएको छ। यद्यपि, खतिवडा सम्पर्कविहीन बनेको विषयमा प्रभु बैंककाे आधिकारिक धारणा आएको छैन।
प्रबन्धक खतिवडाबाट पीडित बनेका स्थानीय बासिन्दा सापटी पैसा फिर्ताका लागि प्रहरीलाई गुहार्नका लागि छलफलमा जुटेका छन्।
पैसा सापटी लिएको विषयमा पीडितको उजुरी वा कुनै गुनासो नआएको जिल्ला प्रहरी कार्यालय खोटाङका प्रमुख प्रहरी नायब उपरीक्षक मञ्जिल मुकारुङले बताए।
