वीरगंज | म्यानपावर व्यवसायी आन्दोलनमा उत्रिएका छन् । सरकारसँग ७ साउनमा अघि सारेका १५ बुँदे माग सम्बोधन नगरिएको भन्दै नेपाल वैदेशिक रोजगार व्यवसायी संघले आज आन्दोलनका कार्यक्रम अघि सारेको हो ।
संघले आज रातिदेखि वैदेशिक रोजगार विभागबाट प्रदान गरिने सेवा नलिने घोषणा गरेको छ । आज आयोजना गरेको पत्रकार सम्मेलनमा संघका प्रथम उपाध्यक्ष महेशकुमार बस्नेतले माग सम्बोधन नभएसम्म सरकारले दिने सेवा सुविधा नलिने बताए ।
विभागले पूर्व र अन्तिम श्रम स्वीकृति, विज्ञापन, मागपत्र प्रमाणीकरण लगायत सेवा प्रदान गर्दै आएको छ । संघले माग सम्बोधन नहुँदासम्म यी सेवा नलिने घोषणा गरेको हो ।
त्यस्तै आन्दोलन क्रममा पनि सरकार तथा सरोकारवाला निकायसँग वार्ता तथा छलफल जारी राख्ने बस्नेतले बताए । चरणबद्ध आन्दोलन घोषणा गरेको संघले माग सम्बोधन नभएसम्म म्यानपावरले आफ्ना कार्यालयको तालाचाबी सरकारलाई बुझाउने र त्यतिगर्दा पनि माग सम्बोधन नभए १ भदौदेखि कार्यालय बन्द गरेर श्रमिकलाई वैदेशिक रोजगारीमा पठाउन बन्द गर्ने बताए ।
वैदेशिक रोजगार विभागले भारतीय विमानस्थल हुँदै श्रमिकलाई वैदेशिक रोजगारीमा पठाउने म्यानपावर व्यवसायीलाई कारबाही गरेको थियो ।
संघले उक्त कारबाही फिर्ता लिनुपर्ने, श्रमिकको पारदर्शी लागत र व्यवसायीको वैज्ञानिक सेवा शुल्क तोकिनुपर्ने, श्रमिक लक्षित श्रम गन्तव्य मुलुकको हवाई भाडादर न्यूनीकरण र कृत्रिम अभाव सिर्जना अन्त्य गर्नुपर्ने लगायत माग अघि सारेका छन् ।
संघ अध्यक्ष डिकबहादुर खत्रीले आजसम्म श्रम स्वीकृति लिइसकेकाको हकमा १ भदौसम्म वैदेशिक रोजगारीमा पठाइसक्न समय दिइएको बताए । आन्दोलन क्रममा श्रमिक पठाउने म्यानपावर व्यवसायीलाई संघको सदस्य संस्थाबाट हटाउने चेतावनी उनले दिए ।
