रुसले मोल्दोभाको पश्चिमपरस्त सरकारलाई हिंसा भड्काएर सत्ताच्युत गराउन खोजेको त्यहाँकी राष्ट्रपति माइया सान्दुले आरोप लगाएकी छन् ।
विदेशी तत्त्व तथा देशभित्रैका आपराधिक समूहलाई हिंसा भड्काउनका लागि रुसले उक्साएको उनको दाबी छ ।
षड्यन्त्र सफल भएको भए पूर्वी युरोपमा रहेको मोल्दोभाबाट युक्रेनमा थप आक्रमण गर्न रुस सफल हुने सान्दुले बताइन् । अनि मोल्दोभालाई युरोपेली संघमा आबद्ध हुन पनि यसबाट रोकिन्थ्यो भन्ने उनको दाबी छ ।
युक्रेनका राष्ट्रपति भोलोदीमीर जेलेन्स्कीले ब्रसेल्समा गत साता यस विषयमा खुलासा गरेका थिए । रुसले मोल्दोभाको लोकतान्त्रिक व्यवस्था भत्काउनका लागि कस्तो कार्य गर्दैछ भन्ने कुरा लेखिएको दस्तावेज आफ्ना गुप्तचर निकायहरूले फेला पारेको उनको भनाइ छ । त्यसलाई मोल्दोभाका अधिकारीहरूले पुष्टि गरेका हुन् ।
‘यी कार्यमार्फत संवैधानिक व्यवस्था खलबल्याउन खोजिएको थियो अनि (राजधानी) चिसिनाउको वैध सरकारको स्थानमा अवैध सरकार ल्याउने प्रयास गरिएको थियो,’ सान्दुले सोमवार बताइन् ।
विगतमा सोभियत गणतन्त्रका रूपमा रहेको मोल्दोभाको जनसंख्या लगभग १६ लाख छ । उक्त देशलाई रुसले लामो समयदेखि दबाब दिँदै आएको छ ।
मोल्दोभा युक्रेनको छिमेकी मुलुक हो ।
त्यहाँका पश्चिमपरस्त प्रधानमनत्री नतालिया गाव्रिलिताले अनपेक्षित रूपमा शुक्रवार राजीनामा दिएका थिए । युक्रेनमाथि रुसी आक्रमणका कारण उत्पन्न संकटलाई उनले राजीनामा दिने क्रममा सन्दर्भ बनाएका थिए । युक्रेन युद्धका कारण महंगी बढेर सर्वसाधारणको जीवन कष्टकर बनेको छ ।
राष्ट्रपति सान्दुले उनको स्थानमा अर्का एक पश्चिमपरस्त अधिकारीलाई प्रधानमन्त्री बनाएकी छन् ।
