वीरगंज । २ हजार ७ पदको लागि खुलेको म्यादी प्रहरी भर्नाका लागि पर्सा जिल्लामा ७ हजार ३ सय १८ जनाको आवेदन परेको छ । अवेदन दिएका उम्मेदवारहरुको म्यादी प्रहरीमा भर्ना हुनको लाखि मौखिक र लिखित परिक्षा लिने कार्य भइरहेको जिल्ला प्रहरी कार्यालय पर्साले जनाएको छ । समान्य लेखपढ गर्न सक्ने ५५ बर्ष उमेर नकटेको नेपाली नागरिकले म्यादी प्रहरीमा आवेदन दिन सक्ने गृह मन्त्रालयले भनेको भएपनि पर्सा जिल्लामा समान्य लेखपढ गर्न सक्ने देखि स्नातक गरेकाहरुले समेत आवेदन दिएका छन् । आन्तिम आवेदन आइसक्दा सम्म स्नातक गरेकोहरुले समेत म्यादी प्रहरी बन्नका लागि आवेदन दिएको जिल्ला प्रहरी कार्यालय पर्साका प्रहरी प्रवक्ता प्रहरी नायब उपरीक्षक दिपक गिरीले बताए ।
आवेदन दिएकाहरु मध्ये यस भन्दा पहिलाको स्थानिय तहको निर्वाचनमा म्यादी प्रहरीमा काम गरेका तथा पूर्व सुरक्षाकर्मीहरुको शारिक तथा लिखित परिक्षा नहुने र उनीहरु सिधै मौखिक परिक्षाका लागि योग्य हुने प्रवक्ता गिरीले बताए । परेको कुल आवेदन मध्ये पर्सा जिल्लामा १५ सय देखि १६ सयको हाराहारीमा पूर्व म्यादी प्रहरी तथा पूर्व सुरक्षाकर्मीहरुको आवेदन परेको जिल्ला प्रहरी कार्यालय पर्साले जनाएको छ । २०७९ सालको स्थानिय चुनावमा म्यादी प्रहरीमा खटेका उम्मेदवारहरुको धेरै आवेदन आएको प्रवक्ता गिरीले बताए । त्यस मध्ये पनि महिला उम्मेदवार पनि छान्नु पर्ने हुँदा नयाँको लागि सिट संख्या थोरै रहेको उनको भनाई छ । म्यादी प्रहरीमा आफ्नो मान्छे हो भन्दै पास गराई दिनका लागि थुर्पै नेता देखि समाजिक अभियन्ताहरुले समेत दवाव दिने गरेको भएपनि जिल्ला प्रहरी कार्यालय पर्साले एकदमै फेयर तरिकाले परिक्षा लिइरहेको प्रवक्ता गिरीको भनाई छ ।
म्यादी प्रहरीमा भर्ना हुनका लागि दलाल मार्फत काम भइरहेको तथा ५ हजार देखि १० हजार सम्म पैसा प्रहरीले खाएको आवेदकहरुको आरोप रहेको छ । तर जिल्ला प्रहरी कार्यालय पर्साले यो कुराको खण्डन गरेको छ । पर्साका प्रहरी उपरीक्ष रमेश कुमार वस्नेतहरुले यो सबै आरोपहरु झुठा रहेको बताए । उनले प्रहरीले इमन्दारी पूर्वक नियम संगत ढङ्गले काम गरिरहेको दावी गर्दै हल्लाको पछि नलाग्न तथा कुनै दलाललाई पैसा नदिए अनुरोध गरे । कसैले म्यादीमा भर्ना कराई दिने भन्दै पैसा मागेको खण्डमा प्रहरीलाई खबर गर्न वस्नेतले आग्रह गरे ।
