वासिङटन । पहिलोपटक पूर्णत: निजी मिसनमा इन्टरनेसनल स्पेस स्टेसन (आईएसएस) पुग्नका लागि चारजना अन्तरिक्ष यात्रीले पृथ्वी छाडेका छन् । ती चारैजना पुरुषका टोलिलाई ‘एक्जिअम–१’ क्रू नाम दिइएको छ । एक्जिअम एउटा व्यावसायिक अन्तरिक्ष उडान कम्पनी हो । केही वर्षपछि अन्तरिक्षमा आफ्नै स्टेसन निर्माण गर्ने यसले आशा लिएको छ ।

अमेरिकाको स्थानीय समयअनुसार बिहान ११ बजेर १७ मिनेट जाँदा स्पेक्स एक्स फल्कन रकेटमा बसेर यो टोलि फ्लोरिडाको केन्नेडी अन्तरिक्ष केन्द्रबाट प्रस्थान गरेको हो । ‘एन्डिभर’ नाम दिइएको क्याप्सुलले शनिबार स्टेसनमा डक गर्ने अनुमान गरिएको छ ।

अमेरिकी अन्तरिक्ष निकाय (नासा) का पूर्व अन्तरिक्ष यात्री माइकल लापेज–अल्जेरियाले यस मिसनको नेतृत्व सम्हालेका छन् । अन्य अन्तरिक्ष यात्रीमा अमेरिकी रियल स्टेट उद्यमी तथा एरोब्याटिक पायलट ल्यार्री कोन्नर, इजरायली लगानीकर्ता तथा समाजसेवी एतान स्टिब्बे र क्यानडाली उद्यमी, लगानीकर्ता तथा समाजसेवी मार्क प्याथी रहेका छन् । उनीहरूले आईएसएसमा आठ दिन बिताउने छन् । उनीहरूले विभिन्न वैज्ञानिक अनुसन्धानलगायत अन्य परियोजनामा सहभागिता जनाउने छन् ।

यस कम्पनीको आईएसएसतर्फको अर्को मिसन अर्थात ‘एक्जिअम–२’ यसै वर्षको उत्तरार्धमा वा सन् २०२३ को सुरुमा कार्यान्वयन गर्ने योजना बन्दै छ ।

बीबीसीबाट ।