वीरगंज | पर्सामा ग्यास ट्याङकरमा करिब १ सय २० केजी गाँजा बरामद भएको छ । पर्सा प्रहरीले बेवारिसे अवस्थामा रहेको एक सय २० केजी अवैध गाँजासहित एलपी ग्याँस बोक्ने भारतीय नम्बरको ट्याङकरलाई नियन्त्रणमा लिएको छ । वीरगंज महानगरपालिका वडा नम्बर २५ स्थित आईसीपी गेट अगाडी बेवारिसे अवस्थामा रहेको सो परिमाणको गाँजासहिँत उक्त ट्याङकरलाई नियन्त्रणमा लिएको हो ।

ट्याङकरमा लागूऔषध लुकाई राखेको भन्ने सूचनाको आधारमा प्रहरी टोलीले एनएल ०१ के ०७५४ भारतीय नम्बरको ट्याङकरमा खान तलासी गर्दै जाँदा चालक बस्ने क्याबिन भित्र सुनियोजित तरिकाले लुकाइ छिपाई राखिएको अवस्थामा लागु औषध फेला परेको र ट्याङकर चालक फरार रहेको जिल्ला प्रहरी कार्यालय, पर्साले जानकारी दिएको छ ।

बरामद गरिएको गाँजासहित ट्याङकरलाई अनुसन्धानका लागि जिल्ला प्रहरी कार्यालयमा राखिएको छ, हाल फरार रहेका ट्याङ्कर चालकको प्रहरीले खोजी गरिरहेको छ ।