वीरगञ्ज । राजधानीबाहिरकै प्रमुख सरकारी स्वास्थ्य संस्था नारायणी अस्पतालमा फेरि चरम लापरबाहीको घटना बाहिरिएको छ । काँधमा चोट लिएर उपचार गराउन पुगेका वीरगञ्ज महानगरपालिका–२४ रमगढवाका १९ वर्षीय पप्पु पटेलको शरीरभित्रै सर्किजल ब्लेड छोडिएको पाइएको हो ।

सोमबार राति मोटरसाइकल दुर्घटनामा परेका पप्पुलाई काँधमा फलामको रड गाडिएर चोट लागेको अवस्थामा अस्पताल लगिएको थियो । आकस्मिक कक्षमा उपचारका क्रममा टाँका लगाइए पनि ग्लोभ्स, गजजस्ता सामान्य सामग्री समेत नभएकाले बिरामीका साथीहरूले १५० रुपैयाँका लागि मोबाइल फोन नै धितो राख्नु परेको थियो ।

घर फर्किएपछि रातभरि पीडाले छटपटाएका पप्पुले मङ्गलवार निजी एक्स–रे गर्दा काँधभित्रै ब्लेड अड्किएको देखियो । पुनः अस्पताल पुग्दा ड्युटीमा रहेका चिकित्सकले आफू जिम्मेवार नभएको भन्दै पन्छिन खोजेका छन् । आकस्मिक कक्ष प्रमुख डा. कृष्ण साहका अनुसार राति डा. दीपक चौरसिया ड्युटीमा थिए । तर चौरसियाले ब्लेड सडकबाटै घाउभित्र पसेको हुनसक्ने भन्दै दोष नस्वीकार गर्ने प्रयास गरेका छन् ।

पप्पुका आफन्तहरूले यस्तो संवेदनहीनता देखाउँदै ‘सडकमा सर्जरी भएको हो र?’ भनेर प्रश्न गरेका छन् । मेडिकल सुपरिटेन्डेन्ट डा. चुमान लान दासले घटनाबारे जानकारी नपाएको बताउँदै दोषी प्रमाणित भए कारबाही गर्ने बताएका छन् ।

गम्भीर लापरबाहीले बिरामीको ज्यान जोखिममा परेपछि स्थानीयहरूले दोषी चिकित्सक र स्वास्थ्यकर्मीमाथि कडा कारबाहीको माग गरेका छन् ।