पर्सा | पर्सा जिल्लाको वीरगञ्ज महानगरपालिका वडा नं. १५ भिष्वा क्षेत्रबाट मानव बेचबिखन तथा ओसारपसारको आरोपमा एक युवकलाई प्रहरीले पक्राउ गरेको छ।

मिति २०८२ साल असार १६ गते बिहान १२:३० बजे भारतबाट आएका दुई जना युवतीलाई वीरगञ्जमा ल्याई होटल तथा लजहरूमा बेश्यावृत्तिमा संलग्न गराएको सूचनाका आधारमा प्रहरीले छापा मारेर पीडितहरूलाई उद्दार गरेको हो।

पक्राउ परेका युवक बाराको कलैया उपमहानगरपालिका वडा नं. १२ का २९ वर्षीय पवन कुमार साह रहेको पर्सा प्रहरीले जनाएको छ। उनले पीडितहरूलाई खाना खुवाउने तथा पैसा दिने प्रलोभन देखाई बेश्यावृत्तिमा लगाउने, त्यसबाट आएको रकम आफैं राख्ने गरेको खुलेको छ।

पक्राउ परेका साहलाई पर्सा जिल्ला अदालतबाट पाँच दिनको म्याद थप अनुमति लिई थप अनुसन्धान भइरहेको प्रहरीले जनाएको छ। उद्दार गरिएका पीडितहरूलाई सुरक्षित ठाउँमा राखिएको छ।